Оңтүстік Қазақстан облысында ел тәуелсіздігінің 25 жылдығына орай, ұлыстың ұлы күні мерекесінде облыстық «Наурыз» дәстүрлі ән орындаушылар байқауы өтті. Бұл туралы облыс әкімінің баспасөз қызметі хабарлайды.
Ұлттық дәстүрді насихаттап, жас әншілерді қолдау мақсатында ұйымдастырылған байқауға 16-30 жас аралығындағы 16 үміткер қатысып, халық әндерінің қасиеті мен құдіретін көпшілікке паш етті.
Өнер байқауында үміткерлердің орындау шеберлігіне, таңдалған шығарманың тәрбиелік мазмұны мен мағынасына, өнерпаздың сахнада өзін-өзі ұстауы мен сахна мәдениетін сақтауына қарай баға берілді.
Сонымен, байқау қорытындысы бойынша бас жүлдені Созақ ауданының тумасы Елдос Жүсіпов алса, І орынды шымкенттік Ақжол Өсербай иеленді. Ал жүлделі ІІ және ІІІ орындарды сайрамдық Мөлдір Изенова мен отырарлық Шоқан Теңлібаевтар алды.
