Оңтүстіктің полицейлері есірткі өсімдіктерін өсірумен айналысқан түркістандық екі тұрғынды ұстады. Оларды 6 қыркүйек күні есірткі бизнесіне қарсы күрес басқармасының қызметкерлері Түркістандағы әріптестерімен бірлесе жүргізген «Көкнәр -2016» және «Өрмек» жедел-алдын алу іс-шарасы барысында қолға түсірді.
76 және 40 жастағы тұрғындардың үйіне жүргізілген тексеру кезінде тәртіп сақшылары аулада өсіп тұрған 5 түп қарасора өсімдігін және кереуетке жайылған есірткі заттарын анықтап, тәркіледі.
Сот-криминалистикалық сараптамасының қорытындысына сәйкес табылған заттардың жалпы салмағы 135 грам қураған әрі кептірілген, 20 грам кептірілмеген марихуана екені анықталды.
Аталған жайт бойынша қылмысты кодекстің 300-бабымен (құрамында есірткі заты бар тыйым салынған өсімдіктерді егу) іс қозғалды. Күдіктілер ешқайда кетпеу туралы қолхатпен жіберілген. Сотқа дейінгі тергеу амалдары жүргізілуде.
