Шымкент қаласындағы Абай ауданына қарасты үш көп қабатты үйдің ауласы қайта жөнделіп, ел игілігіне берілді. Тұрғындардың қуанышымен бөлісе барған облыс әкімі Жансейіт Түймебаев пен қала әкімі Ғабидолла Әбдіраxымов барша шымкенттіктерді мерейлі қос мереке — Қазақстан Республикасы тәуелсіздігінің 25 жылдығы және 1 желтоқсан — тұңғыш Президент күнімен құттықтады.
— Халыққа ыңғайлы жағдай жасау мақсатында қалада ауқымды құрылыс жұмыстары жүргізілді. Мәселен, шаһардағы көп қабатты 1020 үйдің 829-ның ауласы жөнделіп, 334 үйдің ауласы жарықтандырылды, — деді Жансейіт Қансейітұлы. — Ал 686 көп қабатты тұрғын үйдің ауласына электр бағаналарын орнату жұмыстары жыл соңына дейін аяқталады деп жоспарлануда.
Осынау жұмыстардың барлығы халық игілігі үшін жасалып жатқанын айтқан аймақ басшысы қаламыздың тазалығы мен оны күтіп ұстау тұрғындардың да міндеті екенін жеткізді.
Қазақстан тәуелсіздігінің 25 жылдығы мерекесіне орай «Жұмыспен қамтудың жол картасы — 2020» бағдарламасы аясында республикалық және жергілікті бюджеттен қаржы қаралып, 80-нен астам көп қабатты үйдің ойын алаңдары қайта жөнделіп, жыл соңына дейін пайдалануға беріледі деп күтілуде.
