Бүгін белгілі болғанындай, Өзбекстан азаматтарының Қазақстанға автобуспен қатынауы жеңілдейді. Бұл туралы Парламент Мәжілісінің жалпы отырысында Инвестициялар және даму министрі Жеңіс Қасымбек мәлім етті, — деп хабарлайды inform.kz. «Қазіргі уақытта Қазақстан мен Өзбекстан арасында жолаушылар тасымалы бойынша тұрақты автобус маршруттары жоқ. Бұл өз кезегінде шекараны өту кезінде қолайсыз жағдайға алып келеді. Автомобиль көлігімен жолаушыларды тұрақты, тұрақсыз және транзиттік тасымалына құқықтық норма орнатылады. Бұл құжат сауда-экономикалық байланысты одан әрі дамытуға ықпал етеді, сондай-ақ халықтың мобильділігін арттыруға және екіжақты қарым-қатынасты нығайтуға ықпал етеді», -деп атап өтті министр.
«2006 жылғы 20 наурыздағы Қазақстан Республикасының Үкіметі мен Өзбекстан Республикасының Үкіметі арасындағы Халықаралық автомобиль қатынасы туралы келісімге өзгерістер мен толықтырулар енгізу туралы хаттаманы ратификациялау туралы» заң жобасын таныстыру барысында.
Оның сөзіне қарағанда, Хаттама күшіне енген соң, екі елдің ірі қалаларының арасында тұрақты автобус бағдарлары ашылатын болады. Жоспар бойынша бірінші осындай бағдарлар биылдың соңына дейін ашылмақ. «Аталған Хаттаманы ратификациялау бюджет қаражатын жұмсауды қажет етпейді»,- деді Ж. Қасымбек. Осы орайда ол халықаралық автобус тасымалын ұйымдастыру кезінде қос тарап тасымалдаушылардың нақты бағдарын тепе-тең негізде айқындайтынын атап өтті.
«Тәулік ішінде мұндай ондаған бағдар болуы мүмкін. Мысалы, кесте бойынша автобустар әр сағат сайын жолға шыға алады. Өз кезегінде қажеттілікке байланысты әрбір тараптан бестен немесе оннан осындай тасымалдаушы бекітіле алады. Сонымен қатар әр тасымалдаушыға бір бағдарда бес жыл жұмыс істеу құқығы беріледі»,-деді ведомство басшысы. Министр өз сөзінде Ресеймен бізде 45 түрлі тасымалдаушы жұмыс істеп жатқанын атап өтті.
