ХҚО арқылы «Бала кезінен бірінші топтағы мүгедектің күтіміне байланысты жәрдемақы тағайындау» қызметіне қалай жүгінуге болады.
Шымкент қаласы бойынша «Азаматтарға арналған үкімет» мемлекеттік корпорациясының баспасөз хатшысы Алтынай Татаеваның айтуынша ХҚО-ға қызметті рәсімдеу үшін, I топтағы мүгедек іске қабілетсіз болса, онда оның заңды өкілі немесе қамқоршысы келеді. Ал іске қабілетті болып табылған азамат өзі келуі қажет. Қызмет көрсету уақыты – құжат тапсырған күнді есепке алмағанда 7 жұмыс күні.
Сондай-ақ, құжаттарды толықтыру немесе басқа да өзгерістерге байланысты жәрдемақы тағайындау уақыты 30 күнге дейін ұзартылуы мүмкін. Жәрдемақы мөлшері – 45736 теңгені құрайды, — деп атап өтті Алтынай Татаева.
Бұл жәрдемақыны ХҚО арқылы қалай рәсімдеу үшін;
-Тіркелген жеріңіз бойынша ХҚО-ға кезекті алдын-ала брондаңыз
-Тіркеу бөліміне келіп, броныңызды растап, жеңілдік терезесіне талон алыңыз
-Операторға келесі құжаттарды тапсыру арқылы қызметке өтініш қалдырыңыз:
— Қызмет алушы мен мүмкіндігі шектеулі азаматтың жеке куәліктері
— Егер мүмкіндігі шектеулі азамат іске қабілетсіз болып танылған болса, онда оның заңды қамқоршысының құжаттары
— Егер сенімді өкілі жүгінсе, оның нотариалды расталған сенімхаты
— Егер оралман мәртебесі бар болса, онда оны растайтын құжат
— Қызмет алушының бала кезінен бірінші топтағы мүгедекке қамқоршы ретінде белгіленгенін растайтын құжат
— Мүмкіндігі шектеулі азаматтың мүгедектігі туралы сараптама орталығының анықтамасы
— Жәрдемақы аударылатын есепшот жайлы банк анықтамасы
— Байқоңыр қаласының тұрғындары үшін – Байқоңыр қаласының тұрғын үй шаруашылығының азаматтарды есепке алу және тіркеу жөніндегі бөлімінің анықтамасы
Ескерту, бұл жәрдемақы, I топтағы мүгедектігі бар кәмелет жасына толған, мүмкіндігі шектеулі азаматтардың күтушілеріне тағайындалады.
