Шымкентте шағын несие ұйымына «жалған» қарақшылық шабуыл жасалды, деп хабарлайды ОТЫРАР. Еңбекші полиция бөлімінің кезекші бөліміне шағын несиелік компаниядан шабуыл жасалғаны туралы хабарлама келіп түскен.
Полицейлер келген кезде кассир әйел медициналық бетперде мен көзілдірік киген ер адамның басып кіргенін айтты. Құқық бұзушы пышақпен қорқытып, кассадан 1 миллион теңге алып, белгісіз бағытқа қашып кеткен.
Әйелдің арызы бойынша Қазақстан Республикасы Қылмыстық кодексінің 192-бабы «Қарақшылық» бабы бойынша қылмыстық іс тіркелді.
Жедел қызметкерлер жақын маңдағы барлық дүкендер мен үйлердің тұрғындары мен сатушыларынан сұрау салды. Фоторобот көрші облыстарға жіберілді. «Жалған» қылмыскердің ізіне түсу бір тәулікке жалғасты. Ол өз үйінде ұсталып, полиция бөліміне жеткізілді.
Тергеу барысында, шабуыл туралы хабарлаған микронесие ұйымының қызметкерінің өзі ер адамнан тонау жасауды өтінгені белгілі болды. Ол мұны кассадағы ақша жымқыру фактісін жасыру үшін жасаған.
Қазіргі уақытта аталған фактіге қатысты ҚР Қылмыстық кодексінің 419-бабы «көрінеу жалған хабарландыру» бойынша тергелуде.
Шымкент полициясы азаматтарға қылмыс туралы жалған хабарлау жазаланатынын ескертеді.
