Қалалық базарлардың бірінде орналасқан мобильді аксессуарлар дүкенінің иесі ұрлық туралы полицияға арызданды. Жұмыс орнына келген кәсіпкер бұзылған құлыпты, кассадағы қолма-қол ақша мен бағалы құлаққаптардың ұрланғанын көрген. Келтірілген шығын көлемі 600 000 теңгеге жуық.
Әл-Фараби АПБ-ның қызметкерлері аталған дерекке ұқсас тағы екі арыз тіркеді. Зардап шеккендер – бір базарда орналасқан азық-түлік дүкені мен зергерлік бұйымдар дүкенінің сатушылары. Екі жағдайда да белгісіз біреу кассаны тонап, зергерлік бұйымдарды қолды еткен.
Криминалдық полиция басқармасының қызметкерлері ұрлық жасаған адамды іздеуге кірісті. Бейнебақылау камераларына бетперде, көзілдірік және бас киім киіп жүзін тұмшалаған жас жігіт түсіп қалған. Атқарылған жұмыстардың нәтижесінде базар ұрысы 24 сағаттың ішінде ұсталды.
Бір құлаққапты өзіне қалдырып, қалғанын сатып жіберген. Ол кассадан ұрланған қолма-қол ақшаны жеке қажетіне жұмсаған. Жігіт тек әйелдердің зергерлік бұйымдарын сата алмаған, өйткені олар таза күмістен емес болып шықты.
Қазіргі таңда, полицейлер Қылмыстық кодекстің 188-бабы 3-бөлігі «Заңсыз кіру арқылы жасалған ұрлық» бойынша тергеу амалдарын жүргізуде. Тергеу шаралары аяқталғаннан кейін ұсталған адамға қатысты процессуалдық шешім қабылданады.
