Райымбек Сейтметов атындағы Түркістан қаласы сазды-драма театрында Эльмира Макашеваның аудармасындағы драматург Асахмат Айларовтың «Келісімшарт бойынша қалыңдық!» комедиясы сахналанды. Премьераға Түркістан облысы мәдениет және туризм басқармасы басшысы Әзімхан Қойлыбаев пен театр сүйер қауым қатысты.
Қойылым тапқанын араққа жұмсайтын жалғыз басты еркектің масаң күйде досымен ел президентін үйіне қонаққа шақырамын деп бәстесуімен басталады. Бұл бәстесу телеарнаға шығып, Ресей президенті шақыруды қабыл алады. Міне осыдан бастап бас кейіпкердің өмірі күрт өзгереді. Пәтері, тіпті ауласы күрделі жөндеуден өтіп, қонақты қарсы алуға дайындалады. Жаңарған пәтеріне келісімшарт бойынша жаңа қалыңдық та келеді. Бір басшыны күту жолында лауазымды қызметкерлердің жағымпаздық әрекеттері көрініп, олардың көздегені қызметтен өсу жолы екені белгілі болады. Бас кейіпкерге жалған бақытты өмірді қолдан жасап береді.
Қойылымнан соң басқарма басшысы Әзімхан Қойлыбаев құттықтау сөз сөйледі. Қасиетті қара шаңырақтың еңбегін айта келе, театр ұжымына шығармашылық табыс тіледі. Сонымен қатар биыл Түркістан қаласының Түркі елдерінің туристік астанасы аясында өткізілетін ауқымды іс-шараларға тоқталып, қажың жұртшылықты алда келе жатқан мерекемен құттықтады.
Театрдың көркемдік жетекшісі – Айдар Наурызбаев. Қойылым режиссері – «Құрмет» орденінің иегері Қуандық Қасымов, суретшісі – Қанат Шериев. Рөлдерді Кәмшат Аштекова, Талғат Қарынбаев, Нұржан Ізтаев, Жасұлан Тұрғанбаев сынды театр әртістері сомдап шықты. Өнер сүйер барша көрермен премьераны бүгін де тамашалай алады.
