Бүгінде Шымкент қаласында денсаулық сақтау саласында ауқымды жұмыстар атқарылуда. Жаңашылдықтар да жоқ емес. Тұрғындарға қолайлы жағдай жасау үшін түрлі бағыттағы жаңа жобалар жүзеге асырылуда.
Күні кеше үшінші мегаполиске ҚР Денсаулық сақтау бірінші вице-министрі Тимур Сұлтанғазиев жұмыс сапарымен келді. Оңтүстік Қазақстан медицина академиясының базасында ҚР Денсаулық сақтау бірінші вице-министрі тұрғындармен кездесу өткізді. Кездесу барысында бірінші вице-министр денсаулық сақтау саласындағы өзекті мәселелер мен жаңалықтар жөнінде баяндады. Аталмыш жиынға Шымкенттегі денсаулық сақтау саласындағы барлық мекеме қызметкерлері қатысты.
Тимур Сұлтанғазиев кездесу барысында медицина қызметкерлерінің кәсіптік жауапкершілігін арттыру, дәрігерлердің қоғамдағы мәртебесін жоғарылату, дәрі-дәрмекпен қамтамасыз етуді жақсарту және кадр саясатын жетілдіру бағытында атқарылып жатқан жұмыстарды атап өтті. Қазіргі таңда денсаулық сақтау жүйесін жаңғырту мақсатында бірқатар нормативтік-құқықтық актілерге өзгерістер енгізілген.
Вице-министр Қазақстанда наурыз айынан бастап іске қосылған «Бір күндік клиника» жобасының Шымкент қаласындағы перинаталдық орталықта іске асырылып жатқанын мәлімдеді. Жаңа жүйе жүкті әйелдерге ультрадыбыстық зерттеулерді бір күнде және бір жерде өткізуге мүмкіндік береді. Бұл жоба медициналық қызмет көрсету процесін жеңілдетуге және тиімділігін арттыруға бағытталған.
Сондай-ақ, Тимур Сұлтанғазиев денсаулық сақтау ұйымдарының қаржылық тұрақтылығын нығайту, кадр тапшылығын азайту үшін қосымша ынталандыру шараларын енгізу туралы айтты. Жиын барысында қалалық денсаулық сақтау басқармасының басшысы Нұрлыбек Асылбеков жыл басынан бері және осы кезеңге дейінгі цифрландыру бағытындағы оң өзгерістер мен жұмыстарды баяндады.
Кездесуден кейін бірінші вице-министр жергілікті БАҚ өкілдеріне арналған баспасөз брифингін өткізіп, МӘМС жүйесін жақсарту, емханаларды медициналық техникамен жабдықтау, кезектер санын азайту сынды мәселелер бойынша сауалдарға жауап берді. Сонымен қатар, азаматтарды жеке қабылдап, олардың денсаулық сақтау саласындағы мәселелерін тыңдады.
