Шымкентте жаңадан орнатылған электр бағаналары құлайын деп тұр. Себебі, олар әу баста дұрыс қойылмаған дейді жергілікті жұрт. Салдарынан тіпті тұрғындардың бірін тоқ соққан. Мамандардың жауапсыздығына ашынған жұрт наразылыққа шықты.
«Бағаналар дұрыс орнатылмаған! Соның кесірінен қызымды тоқ ұрды»
Еңбекші ауданына қарасты Қапан Айтжанов көшесіндегі жағдай осы. Мұндағы электр бағаналары қисайып, тұрғын үйлерге құлауға шақ тұр. Тіпті, тұрғындардың бірін осы бағанадан тоқ ұрыпты.
Нина Аронова, Шымкент қаласының тұрғыны: «Қызым маған бағана астынан бу шығып жатқанын көрсетпекші еді. Сол кезде оны тоқ ұрды. Содан кейін балаларды тоқ ұрмасын деп, бұл жерді өзіміз қоршап қойдық. Алайда, олар балалар ғой! Кез-келген уақытта бағанаға жақындауы мүмкін»
Евгений Вершович, Шымкент қаласының тұрғыны: «Жарықты істейміз деді. Міне істеген заттары. Көшенің жартысы істейді, жартысы істемейді. Көршінің қызын тоқ ұрды. Біз үлкендер мейлі, кішкентай бала-шаға жүріп жатыр. Кішкентай балаларды ұрса не болады сосын? Қойып жатқан кезде айтқанбыз, дұрыстап қойыңдар деп. «Біз білеміз, бізге қойып кетіңдер болды» деген. Ертең құласа кім жауап береді соның бәріне?!»
Тұрғындар бұл мәселені жергілікті әкімдіктегілерге айттық деп отыр. Дегенмен проблемсын айтқан жұртты тыңдар құлақ әлі табылмаған сыңайлы.
Әсемгүл Жақыпбекова, Шымкент қаласының тұрғыны: «Біз әкімдікке шықтық. Бәріне хабарластым. Әркімнің номерін беріп, лақтыра береді. Бірақ ешкім келген жоқ. Қайда барсаң, сонда бар деп тұр. Солай жауап берді маған телефонда. Сосын 2 номер берді. Олар тіпті маған айқайлап берді. Бағаналар бері қарай қисайып жатыр. Біз үйде көбінесе болмаймыз, бала-шаға болады. Қазір тастап кетуге қорқып жатырмыз»
Қапан Айтжанов көшесіндегі шешілмеген мәселе жалғыз бұл емес. Тұрғындар мұндағы қоқыстың жиналмайтынын да айтып наразылық танытты. Сөздерінше, жауапты мамандар тазалаған сыңай танытып кететін көрінеді.
Евгений Вершович, Шымкент қаласының тұрғыны: «Біздің көшеде қоқыс көп. Өте көп қоқыс. Каналдың айналасына жинап, жауып қойған. Олардан «каналды толық тазалайсындар ма?» деп сұрадым. Ия, тазалаймыз деді. 1-2 сурет түсірді да жоқ боп кетті. Ешкім жинаған жоқ»
Қисайған банаға мен жанбай тұрған жарық шамдарына Шымкент қаласының жолаушылар көлігі және автомобиль жолдары басқармасы жауапты екен. Мамандарға хабарласып, халықтың мәселесін жеткіздік. Олар бұл проблемалар тез арада шешімін табады деп сендіріп отыр.
Мәди Нышан, Шымкент қаласының жолаушылар көлігі және автомобиль жолдары басқармасының маманы: «Бүгін жарық шамдар жанады. Ертең бағаналарды ретке келтіріліп, тиісті жұмыстардың барлығы атқарылады. Одан кейін ары қарай энергетика басқармасы күтіп ұстау солардың есебінен болады»
Ал, қоқыс мәселесінің қашан шешілетіні белгісіз. Еңбекші ауданының мамандары бұл сұраққа толыққанды жауап қатпады. Жергілікті халық алдымен бағана мәселесі шешілсе, артынан күл-қоқыстан да арылармыз деп сеніп отыр.
