Шымкенттегі 3 жайлы мектеп құрылысы аяқталды. Үшінші тоқсаннан бастап балаларға есігін айқара ашатын білім ордалары толық заманауи жабдықтармен қамтылған. 2 мың орындық 2 мектеп пен 1200 орындық бір білім ошағы оқушыларды қабылдауға толыққанды дайын.
Бұл Тұран шағынауданындағы үш қабатты жаңа білім ордасы. Үшінші тоқсаннан бастап оқушыларға есігін ашатын мектептің құрылысы жақында аяқталды. Балаларға қажетті барлық заманауи құрал-жабдықпен қамтылған жаңа нысанмен қала әкімі танысып қайтты. Мектепті толық аралап шыққан мегаполис басшысы стандартты қоңыраулардың орнына қазақша күй қоюды тапсырды.
1200 орындық білім ошағы «Жайлы мектеп» ұлттық жобасы аясында бой көтерді. Мұнда 59 оқу кабинеті бар. Қосымша заманауи жабдықпен толық қамтылған 85 кабинетте балаларды дамуына барлық жағдай жасалған дейді мектеп директоры. Қазір мұғалімдерді жұмысқа қабылдау үшін конкурс жарияланыпты.
Мира Сүлейменова, №143 жалпы орта мектебінің директоры: «Жалпы мектепте 59 оқу кабинеті бар, 85 жаңа заманауи технологиямен жабдықталған кабинеттер оқушылар мен мұғалімдерге қызмет көрсететін болады. Акт зал және 2 спорт залы бар. Жалпы бұл жайлы мектепте барлық оқушыларға жағдай жасалған. Оқушылардың білім алуына және қолайлы ортада дамуына барлық мүмкіндіктер жасалған».
Ал бұл Нұртас шағынауданында орналасқан жайлы білім ошағы. Бұл нысан 2000 оқушының білім алуына лайықталған. Сыныптар әр пәнге лайық толық жабдықталған. Мәселен, музыкалық кабинетте үйренем деген балалар үшін әртүрлі аспаптарға дейін дайын тұр. Сонымен қатар хореографиялық кабинет пен коворкинг орталықтар бар.
Жаңабай Тәжімбетов, «Samruk-Kazyna Construction» АҚ Шымкент қаласындағы өңірлік басшысы: «Ең ақырғы жабдықтармен жабдықталған. Вентиляция – заманауи жабдықтар. Әр сыныпқа тазартылған, жаздың күні салқындатылған, қыстыгүні жылы таза ауа беріп отырады. Бұл да оқушыларға деген микроклиматтың жақсарғаны сабақ үлгеріміне әсер етеді. Әрбір кабинет ең соңғы үлгідегі технологиялармен жабдықталған».
Жалпы Шымкент қаласында 3 жайлы мектептің құрылысы аяқталып отыр. Олар үшінші тоқсаннан бастап пайдалануға беріледі. Білім ұяларының екеуі 2 мың, бірі 1200 балаға арналған. Үш қабатты білім нысандарының әрқайсысы бастауыш және жоғары сыныптарға арналған блоктардан тұрады.
