Төлеби ауданында көптен күткен қуаныш! Мұнда үш бірдей медициналық нысан пайдалануға берілді. Енді жұрт аудан орталығына ағылмай, өздері тұратын елдімекеннен шықпай-ақ медициналық көмек алуын мүмкіндік туды. Денсаулық сақтау мекемелерінің ашылу салтанатына Түркістан облысы әкімінің орынбасары Нұралхан Көшеров қатысты.
Төлеби ауданында үш бірдей медициналық нысан іске қосылды. Бұл күнді жергілікті жұрт 5 жыл күткендерін айтады. Енді тұрғындар ем-дом алу үшін аудан, қала орталықтарына бармаймыз деп қуанып отыр.
Таңсықбай Сарбасов, Төлеби ауданының тұрғыны:
«Біздің орталықта бар ФАП. Оған жан-жақтан адамдар келгенде сыймайды. Осындай медициналық қызмет көрсететін орталық болу керек еді, қанша жылдан бері»
Фельдшерлік-акушерлік бекетттер Жаңажол, Диханкөл және Зертас ауылдарында ашылды. Жауаптылар жаңа нысандарда медициналық көмек көрсету үшін барлық жағдай жасалған деп отыр. Тіпті мұнда басқа мекемелерде жоқ емдеу бөлмесі де бар.
Қарлығаш Раушанқызы, Төлеби аудандық орталық ауруханасының бас дәрігері:
«Сонымен қатар, бұрын ФАП-тарда болмаған физиотерапия бөлмесі де ашылған. Ол — халыққа әртүрлі қабыну процестері кезінде, созылмалы процесстер кезінде негізгі емнен кейін емнің әсерін жақсарту мақсатында жүргізілетін ем»
Медициналық нысандар «Ауылда денсаулық сақтауды жаңғырту» ұлттық пилоттық жобасы аясында салынған. Бұл бағдарлама бойынша облыста 49 фельдшерлік-акушерлік бекет салу жоспарланған.
Асхан Байдуәлиев, Түркістан облыстық денсаулық сақтау басқармасының басшысы:
«Осы бағдарламаға 49 обьект енгізілген. Жергілікті бюджеттен де салынып жатыр. Келешекте де осы жұмысты жалғастырамыз. Бүкіл облысқа қажетті инфраструктурасын осы 2-3 жылдың ішінде толығымен қамтамасыз етеміз»
Айта кетейік, бүгінде 49 нысанның 12-сі халық игілігіне табысталған. Ал қалған 37 медициналық орын жыл соңына дейін пайдалануға беріледі дейді облыстық денсаулық сақтау басқармасындағылар.
