Түркістан облысында жергілікті атқарушы орган өкілдері талап етілмеген жобалау құжаттамасын өздігінен әзірлеп, оған бюджеттен 210 млн теңге жұмсапты. Ол ол ма, одан бөлек ешқандай конкурссыз автомобиль жолдарын салу және жөндеу саласындағы жұмыстарға мердігерлерді өздері іріктеп алған.
Бұған төтенше жағдайлардың салдарын жою және тағы бірнеше желеуді себеп етіп, сылтауратады. Ал олжаға оп-оңай қол жеткізген мердігерлер онысымен қоймай, күтпеген жәйттарға арнап негізгіз шығындар енгізген. Мұнымен жұмыс қаражатын 177 млн теңгеге қымбаттатқан екен.
Данияр Бигайдаров, Қазақстан Республикасы Сыбайлас жемқорлыққа қарсы іс-қимыл агенттігінің ресми өкілі: «Түркістан облысында автомобиль жолдарын салу және жөндеу процестерін талдау барысында бәсекелестікке жатпайтын тәсілмен 2,2 млрд теңгеге негізсіз шарттар жасасу фактілері анықталды. Бұл конкурстық процедураларды айналып өтуге және жұмыс тәжірибесі мен ресурстары жоқ фирмаларға артықшылық беруге мүмкіндік берді».
Талдау қорытындысы бойынша өзіне би, өзіне қожа боп заңсыздық жасағандар жауапкершілікке тартылды. Сонымен қатар, Түркістан облысының әкімдігі жөнсіз жоғарылаған соманы алып тастап, бұдан былай қаржыландыру бөлінбестен бұрын жобалау құжаттамасын әзірлеуге жол бермейтін заңнамаға өзгеріс жасау бастамасын қолға алды.
