Түркістан облысының басшысы Дархан Сатыбалды бірнеше әлеуметтік нысанның құрылыс барысын қадағалады. Келес ауданына іс сапармен барған өңір әкімі кей ғимараттың сапасына сын айтты. Тіпті, жұмысын жөнді атқармағандардың орнынан кететінін де ескертті.
«Жағдайы мәз емес» деп күрделі жөндеуден өтіп жатқан бұл аурухананың сапасы әлі де сын көтермей тұр. Келестегі медициналық нысанның жөндеу жұмыстары облыс әкімінің көңілінен шықпады. «Абай» ауруханасындағы олқылықтар шұғыл ретке келтірілмесе жауаптылар орнынан айырылғалы тұр.
Дархан Сатыбалды, Түркістан облысының әкімі: «Осы құрылыс басталмай тұрып, проблемасы бітпеп еді, әлі солай. Бір мердігер кетіп тынды, екіншісінің тірлігі мынау. Көтере алмайтын шоқпарды белдеріңізге байлап нелеріңіз бар? Атүсті жүріп, жұмыс істеген соң сапа да оңбайды. Ең арзан құрылыс материалдарын пайдалануды қою керек. Бұл –аурухана! Мұндай қаражатқа жаңасын салуға болады. Біреу кедергі келтірсе, маған айтыңыз! Бірақ, уақытында және сапалы тапсырылсын»
Бұл аурухана – 200 төсек-орындық. Жоспар бойынша мұндағы құрылыс жұмыстары жыл соңына дейін аяқталуы керек.
Өңір басшысы Абай ауылында салынып жатқан 600 орындық мектептің де құрылыс барысын тексерді. 5 млрд. теңгеге жуық қаржыны талап етіп отырған нысан келер жылы аяқталуға тиіс. Облыс әкімі мектеп құрылысына қатысты ұсыныстары мен пікірлерін айтып, жұмысты сапалы атқаруды тапсырды.
Дархан Сатыбалды Абай ауылындағы спорт кешенінің құрылысын да тексерді. Бұл нысандағы жұмыстар 2023 жылы басталған. Мұнда спортты дамытуға қолайлы жағдай жасалмақ. Өңір басшысы жауаптыларға жұмысты жүйелі әрі жауапкершілікпен атқаруды жүктеді. Құрылысты кешіктіргендерге заң шеңберінде шара көрілетінін ескертті.
