Түркістан облысында ақтүтек боран салдарынан өңір аумағындағы 6 маңызды автожолда көлік қозғалысы шектелді. Оның қатарында 1 республикалық және 5 облыстық маңызды жол бар.
Төтеншеліктер блок бекеттерде жеңіл және жүк машиналары ұзын-сонар кептеліспен тұрып қалғанын айтады. Автожолдарда құтқарушылар мен полицейлер кезекшілік етуде.
Жасұлан Айнабек, Түркістан облысы ТЖД басқарма бастығының орынбасары: «Ауа- райының нашарлауына байланысты барлық автокөлік түрлері үшін Түркістан облысы аумағындағы автожолдардың 6 учаскесінде көлік қозғалысына шектеу қойылды. Олар 1 республикалық маңызы бар «Хоргос- Алматы-Тараз-Шымкент-Ташкент» тас жолы және 5 облыстық маңызы бар жолдар. ТЖ туралы халыққа ескерту смс-терін тарату, теледидар мен радио арналары арқылы хабардар еткеніне қарамастан, блокпосттарда көліктердің жиналуы орын алуда: 540 бірлік жүк, 80 жеңіл автомобиль, 650-ге жуық адам блокпосттарда тұр».
