15-ші ақпанда Кеңес әскерінің Ауғанстан аумағынан шығарылғанына 36 жыл толды. Осы датаға орай елімізде, сол сұрапыл жылдары Отан алдында борышын өтеген жауынгерлерге құрмет көрсетіледі. Шымкент мұнай өңдеу зауытында дәстүрлі басқосу өтті.
Айтулы датаға орай «ПетроҚазақстан Ойл Продактс» ЖШС -нің басшылығы 1979-1989 жылдары Ауғанстандағы жауынгерлік іс-қимылдарға қатысқан зауыттың қазіргі жұмыс істейтін қызметкерлері мен зейнетке шыққан қызметкерлерінің басын қосты. Мерекелік шара барысында Ауған соғысының ардагерлеріне сый — сияпат ұсынылып, құрмет көрсетілді.
Бақыт Ерегенов, ПКОП ЖШС-нің президенті: «18 жасында Отанын қорғауға кеткен жігіттерімізді бүгінгі атаулы күнмен құттықтаймыз. Дендеріне саулық, отбастарына амандық тілейміз».
Ауған соғысы ардагерлерінің төрағасы Бақытбек Қалдыкөзов шайқаста көрсеткен ерлігі үшін «Қызыл Жұлдыз» орденімен марапатталған. Батыр, Қарулас жолдастарының қатары сиреп бара жатқаны жанына батқанын айтады.
Бақытбек Қалдыкөзов, ПКОП ЖШС-нің Ауған соғысы ардагерлерінің төрағасы, «Қызыл жұлдыз» орденінің иегері: «Зауытта қазір 12 жігітпіз. Біреуі зейнетке шықты. Алдын 45 ардагер еңбек ететін. Жыл сайын ПКОП басшылығы басымызды қосып, кездесу ұйымдастырып тұрады. Көп рахмет. Сыйақы, санаторияға тегін жолдама беріп тұрады Рахмет».
Төлеби ауданының тумасы Аян Түймебаев Ауған соғысына өз еркімен 1982 жылы аттанған. 1983 жылы жарақат алып ақпан айында елге оралады. Жоғары оқу орнын тәмамдаған жауынгер Шымкент мұнай өңдеу зауытында оператор-бақылаушы болып 34 жыл адал еңбек етіп, биыл абыроймен зейнетке шықты.
Аян Түймебаев, Ауған соғысының ардагері: «Соғыс ешқашан болмасын. Бейбіт өмірде де ерлік жасауға болады. Білім алып, жақсы жұмыс істеп. Спортта да керемет көрсеткіштерге жетуге болады. Еліміздің көк байрағын асқақтатып, Отанымызды ана, бауырларымызды қорғауға дайын болуымыз керек деп жастарға айтар едім».
Ардагерлер өскелең ұрпақты тәрбиелеуде орасан зор үлес қосуда. Ауған жауынгерлерін атаулы күнімен Шымкент қаласының әкімшілігі де құттықтады. Қала әкімінің атынан оларға алғыс хаттар мен құттықтаулар табыс етілді.
Шынар Оразова
