Әлеуметтік желілер мемлекеттік органдарға азаматтардың үнін естіртудің басты құралдарының біріне айналды. E-Otinish сияқты ресми порталдар болғанына қарамастан, көпшілік оларды айналып өтіп, шағымдарын интернет арқылы жеткізуді жөн көреді. Себебі жаппай қоғамдық резонанс тудырған мәселелерге ғана шенеуніктер назар аударып, жауап беруге мәжбүр болады. Ал сарапшылардың пікірінше, қоғамдағы шиеленісті азайту үшін мемлекеттік органдар өтініштерді тек тіркеумен шектелмей, оларды жанжалға ұласқанға дейін шешуге тырысуы қажет.
Мәжіліс депутаты Юлия Кучинскаяның айтуынша, әлеуметтік желілерде шағым айтып, мәселе көтеру халықтың үнін «жоғарғы жаққа жеткізудің» бірден бір жолына айналғандай. Оның пікірінше, тәжірибе көрсеткендей, мемлекеттік органдар азаматтардың өтінішіне назар аударуы үшін әлеуметтік желілерде кеңінен талқыланып, қоғамда резонанс тудыру қажет.
Юлия Кучинская, ҚР Парламенті Мәжілісінің депутаты: «Мемлекеттік органдар тек естіп қана қоймай, мәселелерді шешуге дайын болады. Нәтижесінде, бүгінде әлеуметтік желілер азаматтардың өтініштерінің ресми порталдарын алмастыруда және өтініш берушіге жауап беру үшін биліктегілерге жетудің жалғыз мүмкіндігі болып отыр».
Депутат 6 жыл бұрын елде «Халық үніне құлақ асатын мемлекет «тұжырымдамасының қолданысқа енгізілгенін де еске салды. Азаматтардың өтініштерімен жұмыс тиімділігін арттыру үшін тіпті e-otinish бірыңғай ресурсы іске қосылды. Бірақ сарапшылардың айтуынша, порталдан мәселелердің оң шешіміне қатысты жауаптар тым сирек келеді.
Гүлнар Омарова, Әйелдер істері және отбасылық-демографиялық саясат жөніндегі ұлттық кеңестің мүшесі: «Бес жыл бұрын әлеуметтік желілерде проблемалар айтылып, мәселелер көтерілгенде, тез шешілетін. Қазір қоғамға қозғау салатын үлкен серпіліс болмайынша, кері байланыс аз. Қолданыстағы E-otinish -тен азаматтар өз мәселелеріне қатысты оң шешім шығарылмайтынын көп айтады. Және Кипиай Мемқызметтерден қалай жауап болады, бірден кері байланысқа шығуы керек».
Құқықтық статистика және арнайы есепке алу комитеті ағымдағы жылдың бірінші айында ғана мемлекеттік органдарға 400 мыңнан астам өтініш түскенін айтады. Олардың төрттен бірі басқа құрылымдарға бағытталды. Өтініштер көбінесе үкімет аппараты, бас прокуратура және сыбайлас жемқорлыққа қарсы іс-қимыл агенттігіне қайта жіберіледі. Ал Білім және денсаулық сақтау министрлігінде әрбір екінші үндеу қайта бағытталған.
Юлия Кучинская, ҚР Парламенті Мәжілісінің депутаты: «Өтініш берушілердің айтуынша, Бас прокуратураға, министрлерге қабылдауға кіру олар үшін нағыз кедергілерге толы квестке айналады. Қабылдаулар үнемі кейінге шегеріледі, ауыстырылады немесе мүлде өтпей қалады. Соңында өтініш иесінің алдына мәселені шешуге құзыреті жоқ сарапшы ғана шығады».
Сарапшылардың пікірінше, бұл мәселені шешу – әлеуметтік шиеленісті төмендетудің бірден-бір жолы. Әр мемлекеттік орган өз міндетін нақты білуі және орындауы тиіс, тек ресми жауаппен шектелмеуі қажет. Сонымен қатар, мемлекеттік органдар мен лауазымды тұлғалардың ресми әлеуметтік желілері азаматтардың ондаған өтінішін қабылдайды. Мәселен, Шымкент қаласы әкімдігі мен әкімінің жазбаларының астында тұрғындар жиі шағымдары мен ұсыныстарын қалдырып, кейде тіпті алғыстарын білдіріп жатады.
Тұрғындар пікірі:
«Әкімге рахмет! Ақыры газ келді!».
«Қаланың орталығында цитадель бар, ал оның қасында ескі үйлер орналасқан. Сол үйлердің орнына жаңа үйлер немесе ойын-сауық саябағын салуға бола ма? Қошқар ата өзенінің жағасында демалыс аймағы жасалса жақсы болар еді.»
«Қала әкіміне рахмет, осыншама өтініш түсіп жатыр, ешбірі жауапсыз қалмайды».
Қоғам белсенділерінің айтуынша, әлеуметтік желілер арқылы әкімдік халықтың мұң-мұқтажын естіп, қала, аудан немесе ауылдағы мәселелерді уақытында шеше алады. Бұл – әлеуметтік желілерде кезекті даудың тууын күтпей-ақ, тұрғындармен тікелей байланыста болудың тиімді тәсілі.
Шынар Оразова
