2 млрд. 700 млн. теңгені кімнен сұраймыз? Мегаполистің көне тарихын айқындайтын «Шымқала» қалашығындағы археологиялық қазба жұмыстарына бөлінген қаржы да, құжаты да жоқ. Тіпті, цитадельдің тиісті құжаттары әлі күнге толығымен рәсімделмеген. Туристерді тартып, мәдениетімізді көпшілікке танытатын қалашықтың күйі ешкімді алаңдатпағаны ма?
Қаланың талай жылдық тарихынан сыр шертетін бұл қалашық, тұрғындарға таптырмас орын. Бірақ, әлі күнге дейін құжатының түгенделмегені, көңілге қаяу салады. Қала берді, туристерді құшақ жайып қарсы алатын қалашық қаңырап бос тұрғандай. Өйткені, бүгінге дейін 1 тиын да табыс таппаған. Ал, археологиялық қазба жұмыстарына бөлінген қаржы ұшты-күйлі жоғалған.
Сәрсен Құранбек, Қала әкімінің орынбасары: «2018-2021 жылдары арасында болған дүние. Сол кездегі 2 млрд. 700 млн. теңгенің құжаттары толық емес. Жоғалтып жіберген. Қай уақытта жоғалғанын біз білмейміз. Біз, бұл мақсатсыз жұмсалғаны туралы құзырлы органдарға жолдадық. Сыбайлас жемқорлыққа қарсы күрес департаменті, экономикалық тергеп-тексеру департаментіне жолдадық. Бірақ, ол кісілер құжаттың жоқтығынан ба, басқа ма, қозғап отырған жоқ. Менің білуімше».
Тарихи -мәдени кешенге туристерді тартамыз деп, түрлі қолөнершілерге арналған бөлмелер салып, жалға беретін орындар дайындалған еді. Алайда, адам санының аз баруына байланысты, шеберлердің орнын сипап қалдық. Өйткені, кәсіпкерлер уақыт жоғалтқаны аздай қалтасынан да қағылады.
Сұрақ: «Туристерді тарту бойынша қандай шаралар атқарылуда? Қамыстан салынған бөлмелер бар. Өрт қауіпсіздігі саққталмаған».
Жауап: «Туристерді тарту бойынша жұмыстар атқарылып жатыр. Сол мекеменің ұйымдастыру формасы, КММ болған. Барлық музейдің басын қосып, Саяси қуғын-сүргін музейі, Ерлік музейі, Сайрам музейі, Хакім Абай музейінің басып қостық. Себебі, өздеріне сәл болса да тиын тапсын дедік. Өздеріне жұмсасын дедік. Себебі 2024 жылға дейін бірді-бір тиын таппаған. Төбесі қамыспен жабылған деп жатырсыз ғой. Өзінің талабы бар. Оған жылына бір рет өртке қарсы шаралар жүргізіледі. Егер қабылдап алу актісі болса, су бүркемелері болу керек. Оны зерделейік».
Жылдар бойы қордаланған мәселе бір күнде шешілмесі анық. Құжаты жоқ қалашық, есіл кеткен ақша, Шымқаланың мәдениет саласынан хабар берердей көрінеді. Десе де, алдағы уақытта олқылықтардың орны толар деген үміттеміз.
Нұргүл Жолымбетова
