Шымкентте өткен бірер айда коммуналдық қызмет тарифтерінің өскені байқалды. Баға неге шарықтап барады? Себебі неде? Бұдан бұрын әкімдік «Су ресурстары-Маркетинг» жауапкершілігі шектеулі серіктестігі мемлекет меншігіне қайтарылса, судың бағасы арзандайды деп мәлімдеген болатын. Серіктестік мемлекет меншігіне өтті ме, әкімдік уәдесінде тұра ма? Осы және өзге сұрақтарға тішіміз жауап іздеп көрді.
Наурыз айында Шымкент қаласының мамандандырылған экономикалық соты қала әкімдігінің «Су ресурстары-Маркетинг» жауапкершілігі шектеулі серіктестігіне тиесілі бірқатар су жабдықтау және су бұру нысандары бойынша келісімшарттарды жарамсыз деп тану туралы талап арызын қанағаттандырып, аталған нысандарды мемлекет меншігіне қайтару туралы шешім шығарған болатын. Десе де серіктестік әлі күнге әкімдік балансына өтпей тұр. Осы орында неге деген сұрақ суындайды.
сәрсен Құранбек, Шымкент қаласы әкімінің орынбасары: «Су ресурстары маркетинг» компаниясы бойынша, иә, алғашқы сот кезеңінде бұл компанияның қатысты берілген, компания құрамындағы активтер бар емес пе, соған қатысты берілген біздің әкімдіктің талабы қанағаттандырылғанын, мемлекеттің меншігіне өту туралы шешім қабылданғанын мен айтқан болатынмын. Бірақ, мен сол жерде ескерткем, сот процесі ұзақ процесс. Ол айларға, тіпті жылдарға созылуы мүмкін екенін ескерткен болатынбыз».
«Тұрғындар тарапынан мынадай сұрақтар туындап жатыр. Мемлекет меншігіне өткен кезде судың бағасы арзандайды деген болатынсыз. Сол қашан жүзеге асады?».
Қала әкімі орынбасарының сөзінше, «Су ресурстары маркетинг» компаниясы соттың шешімімен келіспей, апелляциялық шағым түсірген. Әзірге дейін істі апелляциялық сот қарап жатыр. Соған сай су тарифін өзгертуге әкімдік қауқарсыз болып отыр.
Сәрсен Құранбек, Шымкент қаласы әкімінің орынбасары: «Сот процесі жүріп жатыр. Яғни, «Су ресурстары маркетингін» әкімшілік балансына өткізу туралы бастапқы қалпына келтіру туралы сот шешімі бар. Бірақ ол кезең-кезеңнен өтуі керек. Сот процесі жалғасуда. Яғни, бүгінгі таңда тарифті, барлығын тұтастай «Су ресурстары маркетинг» тарапынан қадағаланып отырғандығын айтқымыз келеді. Бұл – бірінші. Екіншіден – иә, біз «Су ресурстары маркетинг» құрамындағы обектілер әкімдікке өткен жағдайда тариф төмендейді дегенбіз. Біз бұл ұстанымымыздан айнығанымыз жоқ. Міндетті түрде Жоғарғы соттың шешімі бола ма, қай деңгейдегі соттың шешімі болады, шешім шығып болғаннан кейін біздің болансқа өткеннен кейін біз тарифтерді қайта қарастыратын боламыз».
Табиғи монополияларды реттеу агенттігінің Шымкент қаласы бойынша департаментінің дерегінше, қалада жарық пен газ бағасын көтеру туралы мәселе қаралған. 1 шілдеден бастап бұл қызмет бағасы өскен. Оған қоса жылу бағасы да тамыз айынан бастап 25,5 пайызға өсіруге шешім қабылданған. Өзге қызмет бағасы туралы әзірге өтініш түспеген.
Абылайхан Кеңес, Табиғи монополияларды реттеу агенттігінің Шымкент қаласы бойынша департаментінің бөлім басшысы: «Тозу бойынша, жылумен жабдықтау бойынша 55,76 пайызды құрайды. «ҚуатЖылу Орталық-3″ мемлекеттік коммуналдық кәсіпорын жылу энергиясы бойынша 37 пайызды құрайды. Сумен жабдықтау саласында қызмет көрсететін «Су ресурстары маркетинг» ЖШС-ның су құбырларының тозуы пайызы 57,6 пайызды құрайды. Су беру саласы бойынша кәріз құбырының тозу деңгейі 75,29 пайызды құрайды. Газбен жабдықтау саласы бойынша газ жүйелерінің тозу пайызы 29 пайызды құрайды».
Ресми мәлімет бойынша, коммуналдық қызмет тарифтері сатылап өседі. Бұл қалыпты жағдай. Тарифтерді бірқалыпты ұстап тұру мүмкін емес. Өйткені жекеменшік компанияларда қадетті құрылғылардың тозығы жеткен. Оны жаңарту мәселесі тұр. Ал мемлекеттік меншіктегі коммуналдық жүйеде тозу деңгейі төмен.
Дилара Иса
