Шымкент қаласында алимент өндіру мәселесін шешу мақсатында қалалық прокуратураның бастамасымен бірқатар уәкілетті мемлекеттік органдардың және жеке сот орындаушыларының қатысуымен кешенді рейдтік іс-шара өткізілді. Бұл шара баланың құқықтары мен заңды мүдделерін қорғау, сондай-ақ алимент өндіріп алу тетіктерін күшейту мақсатында ұйымдастырылды.
Іс-шара барысында борышкерлердің атына тіркелген автокөліктерді анықтау және оларды заң аясында тәркілеу бағытында нақты жұмыстар атқарылды. Жеке сот орындаушыларының материалдары негізінде прокуратура 36 борышкерге қатысты автокөлікті ұстау және арнайы айыптұраққа жеткізу туралы қаулы шығарды. Бұл тұлғалар алимент өндіру туралы сот шешіміне қарамастан, өз міндеттерін орындаудан жалтарып келген.
Рейд кезінде Шымкент қаласындағы көлік қозғалысын бақылауға арналған «Сергек-Қорғау» интеллектуалды жүйесі мен Жедел басқару орталығының деректері пайдаланыла отырып, 7 автокөліктің нақты мекенжайы мен қозғалыс бағыты анықталды. Нәтижесінде көліктер жолда тоқтатылып, заң аясында айыптұраққа қойылды.
Атқарылған шара бір күн ішінде нақты нәтижесін берді — тәркіленген мүлік арқылы жалпы көлемі 4,7 миллион теңге болатын алимент қарызы өндірілді. Бұл сома балалардың күнкөрісі мен негізгі қажеттіліктерін қамтамасыз етуге бағытталады.
Прокуратураның мәліметінше, алимент төлеуден жалтару — Қазақстан Республикасының заңнамасы бойынша құқықбұзушылық болып табылады және ол үшін әкімшілік немесе қылмыстық жауапкершілік көзделген. Егер борышкер сот шешімін елемей, ұзақ уақыт бойы алимент төлемей жүрсе, оған қатысты қылмыстық іс қозғалуы мүмкін. Мұндай шаралар заңның үстемдігін және баланың құқығы мемлекеттің қорғауында екенін көрсетеді.
Шымкент қаласының прокуратурасы бұл бағыттағы жұмыстар алдағы уақытта да жалғасатынын мәлімдеді. Рейдтік шаралар тұрақты түрде өткізіліп, борышкерлердің мүлкі, қаржылық активтері мен басқа да заңмен рұқсат етілген нысандарын анықтау арқылы өндіріп алу шаралары күшейтіледі.
Бүгінде алимент мәселесі тек жеке отбасылардың емес, тұтас қоғамның өзекті проблемасына айналып отыр. Әсіресе балалардың әлеуметтік және материалдық жағдайына тікелей әсер ететін бұл мәселе мемлекеттік деңгейде бақылауға алынған. Сондықтан мұндай рейдтер құқықтық тәртіп пен әлеуметтік әділеттілікті қамтамасыз етудің маңызды құралы болып қала береді.
Жанна Құрманбекова
