Әрдайым ерлік жасап көпшіліктің құрметіне ие болып жүретін еріктілер бұл жолы өздеріне көшбасшы ізбасар дайындап жүр. Жазғы уақыттарын да тиімді әрі көңілді өткізіп, қатарларын көбейтуді көздеуде. Айта өтейік, бүгінде еріктілердің презентациясына қатысқан жастар қобалжып отырғанын жасырмады. Бірақ ерікті үшін бұл кешірілмес қателік. Сондықтан да бірінші кезекте көпшіліктің алдында ойын бүкпесіз жеткізуді меңгеруде. Өйткені бір айдан соң ерікті жастар қатарын толықтыруы тиіс.
Олеся Ли,“Еріктілердің” мүшесі:“Бізге жаңадан қосылып, қатарымызды қалыңдатып отырған замандастарымызды көріп қуанып отырмын. Бүгінде әрине келіп отырғандарға біздің атқарып немесе түсіндірмелеріміз тұман болып көрінген болуы керек. Десе де олардың белсенділігі мен қызығушылығы мұндай сезімдерді жойып жіберетіні бар. Ендеше, бұл жастар біздің тобымызда жүріп талай белестерді бағындыратынына сенемін”.
Нұрила Шекербек:“Мен мұнда келіп көп нәрсе үйрендім. Ең бастысы, қоғаммен жұмыс жасауды. Айта өтейін, бұл ұйымға бұрындары қарап қызығатынмын. Қайырымдылық жәрмеңкесі болсын, мейлі қандай болса да үнемі маңызы мол бастамаларды өткізетіндеріп көріп, осы еріктілерге қабылданғым келді. Міне, бізді оқытып, тәжірибелерімен бөлісуде. Сондықтан, көшбасшылық қасиетті меңгеруміз маңызды”.
Ерікті — еріккеннің жұмысы емес. Оған – қызығушылық қажет дейді тәжірибелілері. Олар мына жастарды сөзсіз қатарына қоспақ. Өйткені қызығушылық пен ынта-ықылас бар. Ал қала көшелеріне шығып, көпшілікпен ашық жарқын араласу еріктілерге жат қылық емес. Сондықтан Орталықтың ұстаздары шәкірттерінің батылдығымен ерекшеленгенін қалайды. Бұл орынды да. Еріктілер ерекше және ұтымды жобаларымен өзгелерден оқ бойы озық тұруы маңызды.
Айнұр Әбсеметова, оқытушы:“Көпшілік алдында еркін сөйлеу, ойын еркін жеткізуге арналған жаттығулар жастарға қажет-ақ. Бұл арқылы өздеріне сенімділігі артады. Ортамен жұмыс жасауды үйренеді. Бастысы, келешегінің кемелді болуы үшін де бұл жаттығулардың маңызы зор”.
Ерікті жастардың бұқаралық шараларда көмегі зор. Қонақтарды қарсы алу, шығарып салу немесе жастар арасында насихат жүргізу. Яғни таптырмас көмекші. Сондықтан олардың өз ісінің нағыз маманы болуына барынша күш жұмсалуда. Бірақ қосымша жұмыспен оқуын қатар алып жүру басты назарда болмақ. Міне, шымкенттің болашақ волонтерлері. Оларды бір айдан соң қала көшелерінде көруіңіз де мүмкін.
