Жабайы саудамен күрес тағы да басталды. Отырған орнына ақша төлемей, әрі қаланың көркін қашырғандар ескертуді ескерер емес. Арнайы комиссия шаһардың үш ауданы бойынша тексеру жұмыстарына кірісті.
Шымкенттегі Республика даңғылының бойына жағалай орналасқан жабайы сауданың қатары азайған. Мүмкін алдын ала ескерту болған да шығар. Бірақ, ескертуге де, заңға да құлақ аспайтын мына сатушылар тексеру комиссиясының мүшелерін айқайдың астына алды.
Газет-журнал сататын Дильфуза Сидированың осы жерді сауда нүктесіне айналдырғалы 15 жылдың жүзі болыпты. Өзінің айтуынша екі рет сотқа тартылып, сан мәрте айыппұл төлеген. Аузы күйіп, әкімдіктегілерден арнайы дүңгіршек те сұраған. Бірақ рұқсат алмапты. Өзі бала-шағамды осымен асырап отырмын дейді.
Дильфуза Сидирова, сатушы: «Бізге арнайы дүңгіршек қойып беріңіздер. Табысым осы сауда көзі болғандықтан, салық төлеуге дайынмын. Мен азық-түлік сатуға дүкен немесе үй сұрап жатқаным жоқ».
Ретсіз саудамен күрес бір күндік жұмыс емес. Үздіксіз ескерту мен тыңғылықты қадағалауды қажет етеді. Тек әкімнің бұйрығымен қимылдайтын жауаптылар барын салып, ретттемек те болды. Аяқ алып жүру мүмкін емес «Жабық» базардың маңы да жиналған. Уақытша болса да тап-таза. Арнайы топ базар сыртында балық сататын мына кісіні нысанаға алды. Сөйтсе, оның саудаға рұқсат қағазы жоқ екен. Балықты қайдан, қалай аулап келгені де белгісіз. Сондықтан болар, учаскелік полиция хаттама толтырып, саудасын жинатты.
Серғазы Сералиев, Абай АІІБ учаскелік инспекторы: «Айыппұл салып, хаттама толтырып экономикалық сотқа өткіземіз. Ескертуді тыңдайтындар аз. Сондықтан осындай шараға барамыз. Күнделікті «Жабық», «Көмешбұлақ» базарлары маңында осындай түсіндірме жұмыстарын көптеп жүргіземіз».
Айтпақшы, ретсіз саудамен күрес көзбояушылық емес дейді кәсіпкерлік бөлімінің мамандары. Нәтижесі де көңілге қонымды.
[youtube]http://www.youtube.com/watch?v=QH3dXVsmBVU[/youtube]
