Қазақстан Халықтар Достығы университетінің ректоры Әбдімұса Қуатбеков — білім саласын дамытуға, білікті және бәсекеге қабілетті мамандар даярлауға көңіл бөліп, атсалысып жүрген жан. Өмірін білім мен ғылымға арнаған ұлағатты ұстаз, академик жетімдерді де жебеп, жетелеп келеді. Осы қамқорлығын ескерген ұрпақ ағаларына арнап былтыр Арыс қаласындағы Төлеген Тәжібаев атындағы балалар үйінен мұражай ашқан болатын. Ал бүгін сол мұражайдың құжатын ресми түрде тапсырды.
Академик, химия ғылымдарының докторы, профессор Әбдімұса Мұратұлына деген балалар үйінің тәрбиеленушілерінің ыстық ықыласы шексіз. Соңғы 15 жылдан бері жетімдерді жебеп, шәкіртақы тағайындап, тегін оқытып, қала берді жұмысқа орналастырып жүрген жомарт жанға қандай құрмет көрсетсе де жарасады дейді олар.
Меруерт Нұрланқызы, Арыс қаласындағы Т. Тәжібаев атындағы балалар үйінің директоры: «Жүрегі кең, Оңтүстік өңіріне үлгі-өнеге боларлықтай өмірі, істеген ісі бар. Сондықтан, мұражай ашайық деп, балалардың өздері ұсыныс жасады. Педогогикалық кеңестің қолдауымен мұражайғаакадемик Әбдімұса Мұратұлының есімін бердік.»
[youtube]http://www.youtube.com/watch?v=YO33Gwjev_Y[/youtube]
Балалардың біріне әкесіндей, енді біріне атасындай қамқорлық жасаған жанның жеткен жетістігі үш бөлмелі мұражайдың бір бөлмесіне жайғасқан. Арыстағы балалар үйінде тәрбиеленушілердің 80 пайызы — Әбдімұса Қуатбеков атындағы шәкіртақының иегері. Күнделіктерін беске толтырып, білімге деген құштарлығын арттырып жүрген олар аталарының үмітін ақтауға уәде берді.
