Шымкентте электр сымын өз бетімен жөндемек болған адам мерт болды. Бағанаға шыққан оны тоқ бірден ұрған.
Қайғылы жағдай Шымкенттің іргесіндегі бұрынғы «Откормсовхоз» бөлімшесінде орын алды. Бұл туралы облыстық төтенше жағдай департаментіне қарасты апатты-құтқару жасағының мамандары хабарлайды.
63 жастағы кісі үйінің жанындағы электр бағанына шыққан. Құлап қалмайын деп, белінен ағашқа байлап та алыпты. Сөйтіп, сымды жалғамақ болған кезде бірден тоқ ұрған. Соның салдарынан қария тіл тартпай кетті.
Мұны көрген көршілері дереу құтқарушыларға хабар берген. Оқиға орнына келіп жеткен мамандар марқұмның денесін кран және альпинистік құралдың көмегімен жерге түсірді. Содан кейін полиция қызметкерлеріне тапсырды.
[youtube]http://youtu.be/vky-MSKvLE0[/youtube]
Айта кету керек, бұл – осы жазда тоқ ұруға байланысты екінші қайғылы жағдай. 14-шілде күні Шымкенттегі 11-шағынауданның тұрғыны да электр сымын жалғамақ болған кезде опат болған.
