Шымкенттік көрермендердің назарына «Риголетто» операсының премьерасы ұсынылады. Күрделі қойылым бұл жолы замануи үлгіде жұртшылыққа жол тартпақ.
Бұл жөнінде бүгін облыстық опера және балет театрында өткен баспасөз-жиында айтылды. Белгілі композитор Джузеппе Вердидің осы танымал шығармаларының бірінде басты кейіпкер Риголеттаның өмір жолы көрініс тапқан.
Рустам Гафаров
Рустам Гафаров, «Риголетто» операсындағы басты рөлді сомдаушы:» Мойындау керек, қойылымның құрылымы расында күрделі, қиын. Маған алғашында қоңырау шалып, жауапты жүкті табыстағанда қобалжыдым, театр — жас ұжым, әртістері де жас. Бірақ оларды алғаш көргенде көздеріне қарап-ақ үлкен сенімді, жанарындағы жалынды көрдім. Олардың өнерге деген махабатты байқалады. Тіпті күн-түн демей, тәулік бойы қызмет етуге бар екенін білдірді. Дайындығымыз жақсы, сондықтан театрға келген көпшілік рухани демалып қайтады деп қуана айта аламын».
Шытырманға толы қойылымды шебер сомдау үшін үш бірдей елдің — Қазақстан, Өзбекстан мен Қырғызстанның мәдениет қайраткерлері мен сахна саңлақтары тер төккен. Шымкенттік және шетелдік опера шумақтарын жинақтап, байланыстыру қырғызстандық тәжірибелі режиссер Нұрлан Асанбековке жүктеліпті.
Айта кетейік, «Риголетто» операсының тұсаукесері 25 маусым күні өтеді. Дәл осы шығармамен облыстық опера және балет театры өзінің 7-маусымын қорытындылайтын болады.
