Сапасыз құрылыс сан соқтырды. Шымкентте Төле би көшесі, № 15 үй тұрғындары шу шығарды. Редакциямызға арыздана келген жергілікті халық жаңарту бағдарламасы аясында жөндеуден өткен үйде қыстай алмай жатқандарын айтады.
Іргесі 1958 жылы қаланған 2 қабатты үй былтыр арнайы сараптама қорытындысында апатты деп танылған. Жергілікті билік сейсмо-нығайтуды қажет ететін бұл баспанаға күрделі жөндеу жүргізуге шешім шығарыпты. Қазан айынан бастап мердігерлер жөндеу жұмыстарына кіріседі.
Алайда тұрғындар құрылыс жұмыстары аяқталмай жатып-ақ ақаулардың шығып жатқанын айтады.Үйдің қабырғалары қарс айрылып, төбеден су ағып жатыр дейді. Тұрғындар жөндеу жұмыстары толықтай аяқталмай көшіп келуге мәжбүр. Айтуларынша, әу баста келісілген 3 айлық пәтер ақы екі ай төленгеннен кейін тоқтап қалған.
Құрылыс компаниясы кесте бойынша жұмысты наурыз айында аяқтауы тиіс. Ұсақ-түйек шаруаларды айтпағанда күрделі жөндеу жұмыстары бітуге шақ. Мердігерлер үйдің іргетасы мен қабырғаларының нығайтылып, әктеп-сырлап біткенін айтады. Учаске шебері құрылыс компаниясының пәтерақы төлеуге міндетті емес екенін айтады. Десе де қайырымдылық жасап, екі ай бойы барлық үйге 25 мың теңгеден төлеп келген екен.
Осылайша жамалып-жасқалған баспана бір жағынан жөнделсе, бір жағынан бұзылып жатыр. Алайда, мердігерлер 5 жыл ішінде орын алған ақауларды ретке келтіруге уәде етті. Енді жаңартылған баспананың қашанға дейін шыдас беретінін уақыт көрсетеді.