Өңір басшысы Бейбіт Атамқұлов Мақтаарал ауданына жұмыс сапарымен барып, ондағы мақта терімінің жұмысымен танысты, «Ақ керуен-2016» мерекелік шарасына қатысып, шаруалармен жүздесті.
Кездесу барысында дихандар өнімнің түсімдігі мен сапасын және мақта шаруашылығындағы өзекті мәселелерді талқылады. Жерді өңдеудің жаңа әрі тиімді тәсілін қолданудың нәтижесінде Мақтааралдағы 83 мың гектардан астам жерге себілген шитті мақтадан гектарына 19,6 центнерден өнім алынуда.
Бүгінде аудандағы мақта қабылдау бекеттеріне 34 мың тоннадан астам ақ алтын келіп түскен. Мақтаралдық диқандар биыл 200 мың тонна ақ ұлпа теріп алуды жоспарлап отыр. Биылғы мақтаның келісінің бағасы — 170 теңге.
Мақталы аймақта болған облыс әкімі сонымен қатар сүт өңдеу цехы мен май шығару цехын және мақта шикізатын өңдеу процесімен танысты.
