Шымкенттің 2017 жылғы бюджеті бекітілді. Қалалық мәслихаттың депутаттары бұған дейін бір жеті бойы тұрақты комиссияның отырыстарында келесі жылдың бюджетін егжей-тегжей талқылаған болатын. Нәтижесінде атқарушы билік ұсынған 102 миллиард теңгелік бюджетті депутаттар бір ауыздан қабылдады.
Өткен жылдың желтоқсан айында қабылданған қала бюджеті 64 миллиард теңге болса, биыл ол 102 миллиард теңгеге жетті. Бұл қаржының басым бөлігі, әдеттегідей, білім саласына берілді — 43 миллиард теңге. Ал құрылыс бөлімі қала қоржынының 19 пайызын иеленді. Жол және түрғын үй бөлімдері де қомақты қаржыдан құр қалмады.
Алдағы жылы қаладағы бірқатар білім мекемелеріне спорт алаңдары салынып, мектептердің ауласы қоршалатын болады. Осы мәселені жиі көтеретін депутаттар биыл өз ұсыныстарына қаржыны ақыры бөлдірді.
Бүгін бір ауыздан қабылданған қала бюджетінде әлі бірнеше рет өзгерістер мен толықтырулар болатыны жасырын емес. Соның алғашқысы көп ұзамай алдағы аптада орын алатын болды.
Нұрлан Жаңабай
