ОҚО әкімі діни конфессиялардың жетекшілерімен кездестіАНОНС Жаңалықтар 

ОҚО әкімі діни конфессиялардың жетекшілерімен кездесті

18 қазан — рухани келісім күні. Осы даталы мерекеге орай Оңтүстік Қазақстан облысының әкімі Жансейіт Түймебаев өңіріміздегі бір топ діни конфессия басшыларымен кездесті. Басқосу барысында тараптар өзара пікір алмасып, дінаралық қарым-қатынас мәселелерін талқылады.

Кездесуде өңір басшысы мерекенің маңыздылығына тоқталып, облысымыздағы діни конфессиялардың өзара ынтымақ-бірлігі мен қоғамдағы рөлін сөз етті.

— 1992 жылы 18 қазан күні Алматы қаласында бүкіләлемдік рухани келісім конгресінің 1-сессиясы өткен болатын. Сол конгресте қақтығыстар мен жанжалдарға шектеу қою, татулыққа талпыну, жақын адамдарға қайырымдылық пен жәрдем жасау туралы манифест қабылданды. Содан бері жыл сайын біздің елімізде 18 қазан — рухани келісім күні мерекесі аталып өтілуде. Елбасының сарабдал саясатының нәтижесінде бүгінде еліміз әлемге ынтымақ пен бірлігі жарасқан, коп конфессиялы мемлекет ретінде танылып отыр, — деді Жансейіт Қансейітұлы.

Кездесу барысында сөз алған Қазақстан мұсылмандары діни басқармасының Оңтүстік Қазақстан облысы бойынша өкіл имамы Ахметжан Керімбеков өңіріміздегі діни конфессиялардың ынтымақ-бірлігіне тоқталды.

— Қазақта «Байлық — байлық емес, бірлік байлық» деген аталы сөз бар. Осы сөздің астарында талай мән-мағына жатыр. Облысымызда 18 қазан – рухани келісім күні мерекесі жыл сайын жоғары деңгейде аталып өтілуде. Елбасымыздың бағыт-бағдарының нәтижесінде түрлі діни конфессия өкілдері тату-тәтті, ынтымақта ымыраласып, ғұмыр кешіп жатқан жағдайы бар,- деді Ахметжан Пірәліұлы. 

Мұнан соң Шымкент қаласындағы Свято-Никольский кафедралдық соборының діни қызметшісі Александр Могилевский мен «Шымкент қаласының еврей қауымы» жергілікті діни бірлестігінің жетекшісі Зелик Мурдухаевтер діни бірлестіктердің қоғам алдындағы жауапкершілігін сөз етті.

ОҚО әкімі діни конфессиялардың жетекшілерімен кездесті

Кездесу соңында облыс әкімі конфессия басшыларына мерекеге орай алғыс хаттар мен сый-сияпат табыс етті. Сондай-ақ, рухани келісім күніне орай Оңтүстік Қазақстан облысы әкімінің кубогы үшін діни конфессиялар арасында өткен шағын футбол турнирінің жеңімпазы — облыстық мешіт ұжымына облыс әкімінің кубогы табысталды.

ОҚО әкімінің баспасөз қызметі

Related posts

Пікір қалдыру

Алғашқы болып пікір жазыңыз!

Маған хабар беру:
777
wpDiscuz