Елбасы халыққа арнаған Жолдауында «Еліміздің жаңа әлем көшбасшыларының қатарына қосылу үшін бірінші міндет индустрияландыру жаңа технологияларды енгізудің көшбасшысына айналуы тиіс» — деген болатын. Бұл тапсырма Оңтүстік Қазақстан облысындағы білім беру саласында жоспар бойынша орындалуда. Бұл туралы Білім басқармасының басшысы Исатай Сағындықов мәлімдеді.
Оның айтуынша, өткен жылы балаларды мектепке электронды түрде қабылдау жүйесі енгізілген. Ондағы мақсат — балаларды мектепке орналастыруда ашықтықты, айқындықты қамтамасыз ете отырып, адами фактордың орын алуына жол бермеу. Былтырғы жылы жаңаша жүйенің көмегімен қала мектептерінің 1-сыныбына 21 945 оқушы қабылданса, 23 395 бүлдіршін балабақшаға баруға мүмкіндік алған.
«Цифрлық білім беру ресурстарын дамыту арқылы оқытудың мазмұндылығына, сыбайлас жемқорылықтың алдын алуға бағытталған жұмыстарға көңіл бөлу мәселесі де қолға алынды. Айталық, мұғалімдерді іріктеудегі ашық конкурс, оқушылардың мектепаралық ауыстыру және жеке іс-парағын жүргізу процестері электронды түрде атқарылуда», — деді облыстық білім басқармасының басшысы Исатай Өмірзақұлы.
Қазіргі таңда Шымкент қаласындағы білім беру мекемелеріне ұстаздарды қабылдау жұмыстары да электронды жүйеге ауысқан. Жұмыс іздеген кез-келген азамат www.thunter.shymkent.gov.kz сайтына кіріп, мұғалімдер үшін қандай бос жұмыс орындары жарияланғанын біле алады және құжат тапсыруға мүмкіндік алады. Бүгінгі күнге дейін жаңаша жүйемен 501 педагог жұмысқа қабылданған.
Бұл жүйе мектептердегі оқу-тәрбие ісінде де тиімді пайдаланылуда. Атап айтсақ, қаладағы 40 білім ұясына электронды басқару аппараттық-бағдарламалық кешені енгізілген. Жаңаша жүйе орнатылған мектептерге жүргізілген талдау жұмыстарының қорытындысы бойынша алдыңғы жылдармен салыстырғанда соңғы оқу жылында сабақтан себепсіз қалу деңгейі 75%-ға кеміп, оқушылардың үлгерімі 12%-ға пайызға жоғарылаған.
Айта кетейік, жобаның нәтижесінде, балабақшаға жолдама алу, қызметке тұруда пара талап ету, балаларды мектепке орналастыруда тамыр-таныстыққа жол беру туралы наразылық білдірген қала тұрғындарының арыз-шағымдар айтарлықтай төмендеген.
ОҚО әкімінің баспасөз қызметі
