Шымкенттегі мемлекеттік органдар мен оқу орындары ғимараттарында egov.kz электрондық үкімет порталының бұрыштары пайда болды. Енді тұрғындар қаладағы бір емес, 315 өзіне-өзі қызмет көрсету аймағынан электрондық мемлекеттік қызметтерді өз бетінше ала алады. Маңызды ақпаратты «Азаматтарға арналған үкімет» МК КЕ АҚ Шымкент қаласы бойынша филиалының мамандары мәлімдеп отыр.
Айтуларынша, әр сектор қажетті құралдармен жабдықталған, келушілер электрондық үкімет порталы мен басқа да мемлекеттік ресурстарға кіре алады. Мекенжайыңызға жақын орналасқан секторларды 2gis бағдарламасы арқылы табуға болады.
«Елімізде ТЖ тәртібі алынып тасталғалы ХҚО-да қызмет көрсету тәртібі өзгерді.
Бүгінде Халыққа қызмет көрсету орталықтарынан электрондық форматта қолжетімсіз «қағаз» қызметтерді және egov.kz порталында алдын ала рәсімделген дайын құжаттарды ғана алуға болады. Қазақстанда мемлекеттік қызметтердің 80%-дан астамын электронды форматта алуға қолжетіміді. Олардың барлығы egov.kz порталы арқылы жүзеге асады. Бұл дегеніміз — енді азаматтар мемлекеттік қызметтерді үйден шықпай-ақ немесе ХҚО ғимараттарынан өзге әкімдіктер жанындағы фронт — кеңселерде, оқу орындарында және медициналық ұйымдарда орналасатын өзіне-өзі қызмет көрсету секторларында өз бетінше алуға болады деген сөз», — деді Шымкент қаласы бойынша «Азаматтарға арналған үкімет» МК КЕ АҚ филиалының баспасөз хатшысы Алтынай Татаева.
Айта кетейік, электрондық үкімет бұрыштарында ЭЦҚ немесе бір реттік құпиясөзді қолдана отырып, әртүрлі электронды анықтамаларды алуға, некені тіркеу үшін өтініш беруге, баланы балабақша кезегіне қоюға, заңды тұлға ретінде мемлекеттік тіркеуден (қайта тіркеуден) өтуге, автокөлікті тіркеп, жүргізуші куәлігін ауыстыруға, мемлекеттік бажды төлеуге және т.б. қызметтерді алуға болады. Сондай-ақ, бұл қызмет түрі «Азаматтарға арналған үкіметтің» Шымкент филиалының, Қазақстан Республикасы Мемлекеттік қызмет істері Агенттігінің Шымкент қаласындағы Департаменті өкілдерінің және 2gis мамандарының бірлескен жұмысының арқасында жүзеге асып отыр екен.
Мөлдір Бекеева
