Қаламыздағы жұмыссыз жастарға арналған «Мүмкіндіктер алаңы» атты бос жұмыс орындары жәрмеңкесі өтпек. Аталаған шара 17 ҚЫРКҮЙЕКТЕ «Арбат» алаңында сағат 10:00-18:00 аралығында өтеді.

Іс-шараның негізгі мақсаты – екі қолға бір күрек таппай жүрген студенттер мен 29 жасқа дейінгі жұмыссыз жастарды жұмыспен қамтуға көмектесу. Жәрмеңкеге бас -аяғы 50-ге жуық жұмыс беруші мекемелер қатысады. Оның 9000-ға жуығы медициналық, техникалық, педагогикалық, жеңіл өнеркәсіп және қызмет көрсету салаларының өкілдері.

Сондай-ақ, айтулы жәрмеңкеде, жастарға «Еңбек» мемлекеттік бағдарламасының шеңберінде «Әлеуметтік жұмыс орындары», «Жастар практикасы», «Алғашқы жұмыс орны» бағыттары бойынша ақылы жұмыстар да ұсынылмақ.

Бұдан бөлек, еңбек нарығында сұранысқа ие мамандықтарға кәсіби оқыту курстары туралы мәлімет беріледі. Сонымен бұл іс-шара аясында қызмет көрсету бұрыштары орнатылып, келушілерге жұмыспен қамту орталығы мамандарынан кеңес алу мүмкіндігі қарастырылады.