2022 жылы әлеуметтік осал санаттағы 75 мың бала колледжде оқуға грант алған. Бұл өткен жылмен салыстырғанда 25 мыңға жоғары. Оқуға түскендердің 1101-і — ерекше білім беру қажеттіліктері бар студенттер. Биыл жалпы саны 125 мың грант бөлінген. Бұл — рекордтық көрсеткіш.
ҚР Оқу-ағарту министрлігінің жоспары бойынша 2025 жылға дейін сұранысқа ие мамандықтар бойынша тегін техникалық және кәсіптік білім берумен 100% қамтылады.
Жалпы 2022 жылы қазақстандық колледждерге барлығы 183 мың қазақстандық оқуға түскен. Ал оқушылар көбінесе — құрылыс, білім беру, туризм, қонақ үй бизнесі салаларын таңдаған.
Алтай Рахимберлин, ҚР Оқу-ағарту министрлігі техникалық және кәсіптік білім департаментінің басқарма басшысы: «Биыл тегін оқығысы келетіндер үшін квоталардың тізімі кеңейтілді. Көпбалалы отбасы балалары үшін 5% квота, толық емес отбасы балалары үшін 1% ерекше білім беру қажеттілігі бар балаларды тәрбиелеп отырған отбасы балалары үшін 1% квота қосылды. Соның арқасында жаңа оқу жылында квота санатына 75 мың талапкер түссе, оның 1 101-і ерекше білім беруді қажет ететін балалар».
