«Ұлттық ғылыми кардиохирургия орталығы» АҚ мамандары қатысуымен балалар кардиохирургиясы бойынша шеберлік сабағы өткізілді. Облыста жүректің күрделі туа біткен ақаулары және салмағы 10 кг төмен балаларға ота жасауға үлкен мұқтаждық болуына байланысты жұмыс орнында шеберлік сабағы керек-ақ. Осыған байланысты «Ұлттық ғылыми кардиохирургия орталығы» АҚ мамандары қатысуымен балалар кардиохирургиясы бойынша біршама тәжірибелер жүргізіліп, жас мамандарға отаның қыр-сыры түсіндірілді.
Мастер класс барысында жүректің күрделі ақауы бар балаларға және салмағы 8 кг төмен жүрек ақауы бар балаларға ота жасалып, екі орталықпен өзара меморандумға қол қойылды. Бұл шара балалар кардиохирургиясын әрі қарай дамытуға сөзсіз ықпалын тигізеді және орталықтағы медициналық көмектің сапасын жетілдіруге мүмкіндік беріп, облыстағы жүректің туа біткен ақауы бар балаларға ауадай қажет маңызды және күрделі оталардың қолжетімділігін арттырады.
Оңтүстік Қазақстан облысында жыл сайын шамамен 350-400 бала жүректің туа біткен ақауымен дүниеге келеді екен. Оның ішінде 150 балаға ота жасау қажет. Қазіргі уақытта 1924 бала жүректің туа біткен ақауымен диспансерлік есепте тұрса, олардың 400-дейі бір жасқа дейінгі балалар.
Бұл жолы осы балалардыфң бірқатарына, натқырақ айтсақ, 10 балаға астаналық дәрігерлер шымкенттік мамандармен біріге ота жасады.
Облыстық кардиологиялық орталықта 2011 жылдың 18-наурызында балалар кардиохирургиялық бөлімі ашылған болатын. Бөлім 12 орынға есептелген. Ашылған соң 1 жылдың ішінде орталықта 350 балаға ота жасалды. Осы уақыт аралығында Польшадан келген мамандардың қатысуымен 2 шеберлік сабағы өткізілді. Ол кезде де 90 бала мен ересекке ота жасалды.
Ал Ұлттық ғылыми кардиохирургиялық орталықтың мамандары айына 2-3 рет осылай өзге облыстарға шығып, ота жасайды екен. Бұл біріншіден тәжірибе алмасу болса, екіншіден оталарды әлеуметтік тұрмысы төмен отбасыларының балаларына жасап, күрделі оталардың қолжетімділігін арттырады екен.
