Оңтүстік Қазақстанда «Денсаулық фестивалі — 2016» акциясы өтті. 2016 — 2019 жылдарға арналған «Денсаулық» мемлекеттік бағдарламасын іске асыру шеңберінде өткен республикалық шараның ашылуына облыс әкімінің орынбасары Ұласбек Сәдібеков қатысты.
Акцияның мақсаты – салауатты өмір салтын ұстануға жұртшылықтың, бұқара халықтың назарын аудару болып табылады.
«Біз – салауатты өмір салтын ұстанамыз!» ұранымен өткен акцияға келген оңтүстікқазақстандықтар Қажымұқан атындағы орталық стадионының «Жеңіл атлетика» спорт кешеніндегі «Денсаулық қалашығында» арнайы дәрігер мамандардың кеңестерін алып, тегін диагностикалық тексерулерден өтті.
Сонымен бірге түрлі анализдер тапсырып, облыс орталығындағы фармкомпаниялар ұсынған өнімдерді көрді. Айта кету керек, республикалық шараның өту барысында бір мезетте еліміздің тұрғындарының қатысуымен «Денсаулық марафоны» өтті.
