Оңтүстік Қазақстан облысында Қазақстан тәуелсіздігінің 25 жылдығына арналған, «Бірлігіміз жарасқан мәңгілік ел» атты республикалық айтыс басталды. Ақындардың басын қосқан дүбірлі додаға еліміздің айтулы 16 ақыны мен Қытай, Қырғызстан, Моңғолия, Өзбекстан елдерінің сөз дүлдүлдері де арнайы келіп отыр.
Жүйріктердің бүгінгі сөз сайысына Оңтүстік Қазақстан облысы атынан Ж.Наушабеков, К.Оралова, А.Жаппарқұлова, Н.Мейірманов, Қ.Абзалов, Б.Байтуов, Н.Әнапия, Д.Полатбаев, Т.Түлеулиев, А.Ниязбектер қатысса, Астанадан А.Тұрсынбаева, Ж.Бұлғақов, ал, Қызылордадан М.Айтбай, Қостанайдан С.Әуезхан, Жамбыл облысынан Қ.Мырзахан, Қарағандыдан А.Жұмағұлов сынды біртуар ақындарымыз келіп, бақ сынауда.
Ел тәуелсіздігінің 25 жылдығы мен 1 желтоқсан – Қазақстанның тұңғыш Президенті күніне орай ұйымдастырылған аламан айтысқа облыс әкімдігінің екі жеңіл авто көлігі мен қаржылай жүлде қоры тағайындалып отыр.
Ақындар айтысын облысымыздың тумасы, «Парасат» орденінің иегері, «АРА.kz» журналының бас редакторы, белгілі сатирик Көпен Әмірбек жүргізуде.
Кіл мықтылардың айтыс аламанында қазылар алқасының төрайымы Қазақстанның халық ақыны, Жамбыл Жабаев атындағы сыйлықтың және «Парасат» орденінің иегері Әселхан Қалыбекова болса, қоғам қайраткері, мәдениет қайраткері Оразкүл Асанғазы, Қазақстанның халық ақыны, айтыскер ақын Әсия Беркенова, еңбек сіңірген қайраткер, «Құрмет» және «Парасат» ордендерінің иегері, халықаралық «Алаш» сыйлығының лауреаты, жазушы Мархабат Байғұт пен айтыскер ақын, сазгер Әбдіхалық Әбдірайымұлы сынды азаматтар қазылық етуде.
Екі күнге жалғасатын суырып салма аламан айтысының мақсаты тәуелсіздік жылдарында еліміздің қол жеткізген жетістіктері мен табыстарын өлең сөзбен халыққа жеткізу болып табылады.
Ақындар айтысының жабылу салтанаты 3 желтоқсан күні сағат 11:00-де Түркістан сарайында өтеді.
