Шымкентте оқыс оқиға тіркелді. Шенділер мен әкім-қараларға әбден араз болдым деген азамат көптің көзінше өзіне-өзі қол салды.
46 жастағы тұрғын Нұркен бүгін прокуратура алдында өзін өртеп жіберді. Бұл хабарлама полицейлерге күндізгі сағат 3-тер шамасында түскен. Бизнесмен прокуратура күзетшілерінің көз алдында баклажкаға құйылған бензинді үстіне құйған. Кәсіпкер бұл әрекетінің мәнісін күні кеше БАҚ өкілдеріне айтып берген болатын.
Бірнеше жыл бұрын әкімдік тапсырысы бойынша амбулатория салған азамат құрылыс компаниям жұмысты тапсырғанымен, тиісті қаражатын ала алмай қалдық дейді. Содан бері полиция, прокуратура мен мемлекеттік кірістер қызметкерлеріне бірнеше рет шағым жазғанымен, түк шықпады деп отыр. Ал облыстық ішкі істер департаментінің баспасөз қызметі бұл азаматтың үстінен қылмысты іс қозғалғанын айтады.
Ауыр жарақат алған азамат қазір ауруханада жатыр. Алдын ала болжам бойынша, оның денесінің 40 пайызын күйік шалған.
