Үшінші мегаполис – Шымкенттің төрінде Елордамыздың мерейтойы тойланып жатыр. Астананың 20 жылдығы құрметіне орай, Бас қаланың мемлекеттік академиялық филармония ұжымы күнгейге гәстрөлдік сапарымен келіп, тұрғындарға ән-жыр тартуын жолдады. «Астанадан ақ тілек» атты кешке келіп, өнерпаздарға қолдау көрсеткен жерлестеріміздің де қарасы қалың болды.
«Қазақ» оркестріндегі – шалқыған шабыт, күмбірлеген күй мен саздың сыйқыры ә -дегеннен-ақ, әлем шығармаларымен үндесіп, келген көрерменді баурап алды. Көпшілік бір тыныспен күйдің құдыретін тапжылмай тамашалағанына куә болдық.
Айнұр Қонысбаева – Астана қаласындағы мемлекеттік академиялық филармониясының әншісі. Халықаралық ән байқауларының лауреаты. Дәстүрлі ән мен жырды жұртшылықтың алдында жасқанбай, ерекше құрмет-ықыласпен орындаған өнер иесі күнгейге келуде қоржынындағы шығармаларға талдау-таразылау жүргізгенін жасырған жоқ. Нәтижесінде, Тұрмағанбет Ізтілеуовтың «Тәлім» термесін тыңдарман қауымға тарту етті.
Айнұр Қонысбаева, Астана қаласы мемлекеттік академиялық филармониясының әншісі: «Шымкент қаласы өте жақсы ықыласпен қарсы алды. Ал мерейтойлық кешке «Тәлім» термесін таңдап алған себебім, осы облыста қазақылықтың қаймағы-дәстүрі өте жақсы сақталған. Және бұл еңбекте халқымыздағы тәлім-тәрбие, әдет-ғұрып туралы көп айтылып, насихатталады. Бастысы, мен бұл шығарманы тыңдарманның жүрегіне жеткізе орындадым деп есептеймін».
«Астанадан ақ тілек» атты кеш – Елордамыздың 20 жылдығы құрметіне арналған мәдени жоба. Бас қаланың мемлекеттік филармония ұжымы күнгейге мерейтойлық бағдарламасын таныстырып, құнды- қоржынындағы халық қазыналарын паш етті. Шетел шығармалары – әлем жаһұттарымен қоса, вальс падишаһы – Шәмшінің шығармаларын да шарықтай орындады.
Елордалық өнер ұжымы мерейтойлық бағдарламасының бояуы қанық болуы үшін, театрландырылған көріністің де көмегіне жүгінді. Тағлымды сәттер мен тарихи тұлғалар, өміршең өнер – ұлттық қазынаны ұлықтады. Айта өтейік, биыл Астана қаласындағы мемлекеттік академиялық филармониясының қызметін бастағанына – 21 жыл толып отыр. Өнер жасағында 700-ден астам адам жұмыс жасайды.
Мөлдір Бекеева
