– Көпшіліктің сүйікті әншісіне айналған, ерекше дауысқа ие Қайрат соңғы уақытта сахнадан көрінбей кетті. Сіз қайда жүрсіз?
– Мен ешқайда да кеткен жоқпын. Тек біраз уақыт демалдым.
– Осы демалысыңыздан кейін көрермендеріңіз бен тыңдармандарыңызды қандай жаңалықпен қуантпақшысыз?
– Алғаш рет өзім туып-өскен қаламда, яғни Шымкентте жеке шығармашылық концертімді өткізбекшімін. Бұл – менің оңтүстік жұртшылығына деген сыйым. Осы уақытқа дейін жинақталған әндерім осы кеште шырқалады.
– Бүгінде Сіздің репертуары-ңызда қанша ән бар?
– Дәл қазір сізге нақты санын айта алмаймын. Бірақ, бір айтарым, әншінің абыройы оның әні мен бейнебаянының санымен емес, әннің сапасымен өлшенеді.
– Басыңыздан өткен келеңсіз жағдайдан хабардармыз. Ол мәселе шешімін тапты ма?
– Иә, екіжақты ортақ келісімге келдік. Уайымдайтындай ешнәрсе жоқ.
– Ешкімнен қашып жүрген жоқсыз ғой?
– Жоқ, әрине. Егер қашып жүретіндей болсам, осылай ашық концертімді өткізер ме едім. Немесе шетелге кетіп қалуыма да болар еді ғой.
– Алдағы жоспарыңыз қандай?
– Шығармашылығымды жалғас-тырамын. Жаңа альбом жазып, әндерімнің қатарын көбейтпекпін.
– Арманыңыз не?
– Қазақстан атынан халықаралық «Евровидение» байқауына қатысып, жеңімпаз атану.
– Өмірде неге жаныңыз ауырады?
– Әнші болуға еш мүмкіндігі мен жағдайы жоқ талантты жастарды көргенде жаным ашиды. Оларды көріп, өзімнің жас кезім есіме түседі. Демеуші болып, көмектескім-ақ келеді. Бірақ, әттең… Ондай демеушіге өзім де зәрумін. Демеушім болса, осы күнде біраз жетістікке жеткен болар едім.. Дегенмен, нағыз дарынды қыз-жігіттерге қолдан келгенше көмектесуге тырысамын.
– Болашақта осы өнер жолында қаласыз ба, әлде басқа салаға кеткіңіз келе ме?
– Әншілік өнерімді ешқашан тастамаймын.
– Әңгімеңізге рахмет!
Гүлнұр СӘТБАЕВА
