Оңтүстік Қазақстан облысы Мақтаарал ауданында грециялық инвестор сағатына 200 тонна асфальт-бетон өндіретін зауыт салмақ. Аудандағы индустриалдық аймақта салынатын зауыттың жобалық құны 1 млн АҚШ долларын құрайды.
Құрылысы келер жылы басталатын асфальт-бетон өндіру жобасының инвесторы грециялық NIOVI S.A компаниясы құрылтайшысы болып келетін «Soldatos» ЖШС бас директоры А.Шынтаевты облыс әкімі Ж.Түймебаев арнайы қабылдап алдағы жұмысына сәттілік тіледі.
Бүгінде мемлекет тарапынан инвесторларға қолайлы жағдай жасалғанын айтқан әкім Оңтүстік экономикалық әлеуеті зор, тұрақты дамып келе жатқан өңір екенін атап өтті.
— Аймақ — Орта Азия, Таяу Шығыс пен Еуропа елдерін байланыстыратын жолдардың қиылысында орналасқандықтан, бізде шекаралық сауда-саттық пен экспорттық өндіріс дамып келеді. Сондай-ақ, облыста 11 индустриялды аймақ пен жеңіл өнеркәсіп бағытындағы бір арнайы экономикалық аймақ бар. Облыста инвестиция тарту және инвесторларға бір терезе қағидасы бойынша қызмет көрсететін аймақтық даму институттары жұмыс жасайды. Институттар кәсіпкерлерге кеңес береді және қаржылық пен инфрақұрылымдық көмек көрсетеді, — деді өңір басшысы.
Өз кезегінде сөз алған компания басшысы бұған дейін ауданда мобильді асфальт зауытын іске қосып, Қызылқұм ауыл округінде орналасқан инспекторлық жолдарға асфальт беріп келгенін жеткізді. Сонымен бірге ол зауыттың екінші желісін келер жылдың жаз айында аяқтауды жоспарлап отырғанын атап өтті.
«Soldatos» ЖШС инвесторлары Мақтаарал ауданындағы жобадан бөлек Сарыағашта сағатына 150 тонна, ал Түркістан қаласында сағатына 200 тонна асфальт-бетон шығаратын зауыт салуды жоспарлап отыр.
Айта кетейік, ауданда сыртқы инвестициядан бөлек ішкі инвестицияның есебінен өңдеу зауыты, гигиеналық заттар мен полиэтилен шығаратын өндіріс зауыттарының жобалары да жүзеге аспақ. 38 гектар жерді алып жатқан аудандық индустриалды аймақта жұмыс істеп тұрған «Береке» мақта зауытымен қоса мұнда келер жылы 4 жоба іске асырылады деп жоспарлануда.
ОҚО әкімінің баспасөз қызметі
