Мақтаарал ауданында жас суретшілер байқауы өтті. «Бірлігіміз жарасқан» деп аталатын конкурсты аудандық ішкі саясат, мәдениет және тілдерді дамыту бөлімі мен аудандық қоғамдық келісім мекемесі ұйымдастырған. Байқауға ауданнан 50-ден аса жас суретші қатысып, бағын сынады.
Аталған іс-шара аудан жастарының шығармашылығын қолдау мен насихаттау, өскелең ұрпақ арасындағы азаматтық және отансүйгіштік тәрбиені қалыптастыру және өзге этнос жастарының татулығын нығайтуды мақсат еткен. Үміткерлер өнерлерін паш етіп, шығармашылық шыңдалуға мұндай іс-шаралар аса қажет екенін айтты.
Айта кету керек, осы уақытқа дейін ауданда суретшілердің шығармашылық әлеуетін көтеру бағытында көптеген шараларды ұйымдастырып жүрген бірлестік аудандағы талай жас суретшілердің облыс көлеміндегі шараларда танылуына ықпал етіп келеді.
