Шымкентте жылдың үздік жастары белгілі болды. Жыл сайын дәстүрлі түрде өтіп келе жатқан байқауда биыл 20 жас өз салалары бойынша үздік деп танылды. Марапатты қала әкімі табыстап, жобаның маңыздылығы мен жастарға үнемі қолдау білдіретінін айтты. «ҮЗДІК ЖАСТАР – 2024» номинациясына 153 өтініш түскен екен. Кімдер өз саласының үздігі болды? Іріктеу қалай жүргізілген?
Шымкентте әртүрлі салаларда жылдың үздік жастары белгілі болды. 6 жылдан бері химия пәнінен оқушыларға сабақ беріп келе жатқан Нұркен Базарбайұлы жалпы орта мектепте білім беретін «Үздік жас мұғалім» номинациясын жеңіп, қала әкімінің қолынан марапат алды. Жылдың ең жақсы ұстазы атанған жан дәстүрлі номинациялық шараға бірінші рет қатысып тұрғанын айтады. Соған қарамастан іштей үміттенген педагог еңбегінің еленіп, жүлде бұйырғанына дән риза.
Бұл жетістік ол үшін ұстаздық ұлы істі жалғастыруға шабыттандырса, алға жетелейтін негізгі ұстанымы шәкірттертінің қандай да бір межені бағындыруы, кірпіш дүниеге кетігін тауып қалануы екен. Себебі тәлімгер «біз балаларды оқытып қана қоймаймыз, біз қоғамды тәрбиелейміз» дейді.
Нұркен Базарбайұлы, Сағадат Нұрмағамбетов атындағы №72 ЖОМ химия пәнінің мұғалімі: «Бізде мұғалімдер арасында дарынды балаларға талантты ұстаз атты жас педагогтардың олимпиадасы бар. Сол республикалық олимпиададан 2-орын алдым. Біздің негізгі мақсатымыз қоғамға дұрыс тәрбие, дұрыс бағыт-бағдар беру».
Дәстүрлі түрде жыл сайын жылды қорытындылап үздік жас мамандарды анықтайтын шараға биыл 153 өтініш түскен екен. Соның ішінде 14 пен 35 жас аралығында 20 жас іріктеліп, қала әкімі атынан марапатталды. Төрт бағыт бойынша өткен номинацияда арнайы комиссия баға беріп, үздіктерді анықтаған. Әр бағытқа 3 коммисия мүшесінен тағайындалып, үміткерлерге іріктеу жүргізген. Ұйымдастырушылар коммисия мүшелері қаламыздағы белді, абыройлы азаматтар екенін атап өтіп, олардың әділ әрі бейтарап болғанын алға тартады.
Сонымен үздік жастар номинациясының жеңімпаздарына мүсінше мен құттықтау дипломы және электронды құрал аппараттары табысталды. Шараға қатысқан қала әкімі Ғабит Сыздықбеков барлық номинация иегерлерін өзі марапаттап, жастарға Мемлекет басшысының ұстанымы бойынша әрдайым қолдау білдіретінін айтты.
Ғабит Сыздықбеков, Шымкент қаласының әкімі: «Әрқашан аманшылықта елімізге өз бағыт, салаларыңыз бойынша адал қызмет ете беріңіздер. Біз үнемі сіздердің жандарыңыздан табылып, қолдаймыз. Осы жолы өтпей қалған жастарға айтарым, келесі жылға талпыныңыздар, сіздерге қолдау білдіреміз».
Жамал Шалхарбайқызы Шымкенттің ең үздік жас ақыны атанды. Өлең өріп, өмірде өз орнын тапқан ару қалам мен қағазды 8-сыныптан серік еткен. Бүгінде ол қаламгер ғана емес, тіл әдебиетінің мұғалімі. Биыл сөз шеберінің өлеңдер кітабы жарық көрген екен. Одан бөлек, ақын «осы уақытқа дейін өлең жазуда еткен еңбегім мол, бұл марапат соның жемісі деп білем» дейді.
Жамал Шалхарбайқызы, «Үздік жас ақын» номинациясының иегері: «Қазіргі кезде мен мұғалім боп жұмыс істеймін. Осы жылы менің кітабым жарыққа шықты. Өзімнің авторлық ең алғашқы туындымды шығардым. «Сен туралы» деген кітап. Және бұл биылғы жылдың мен үшін жетістігі деп білем».
Шымкентте үздік жастарды марапаттау қаламызда 4 жылдан бері тұрақты өткізіліп келеді. Ұйымдастырушылар жастарды ынталандыру шарасы бүгінде өзіндік боямасы бар жастар арасындағы маңызды жобаға айналғанын айтады.
