Түркістан қаласында рәміздер алаңы ел игілігіне беріліп, еліміз бойынша биіктігі жағынан үшінші алып ту желбіреді. Ту тұғырының биіктігі 62,5 метрді құрайды. Ал байрақтың ені — 12, ұзындығы — 24 метр. Азаматтардың туған жерге және оның рәміздеріне деген құрметті арттыру, патриоттық рухын ояту мақсатында салынған алаңның салтанатты ашылуына облыс әкімі Жансейіт Түймебаев қатысты.
— Елбасымыз Н.Ә.Назарбаевтың «Тəуелсіздік алтын күмбез дейтін болсақ, сол күмбезді тіреп тұрған төрт белгі — рəміздеріміз бар. Оның біріншісі — елтаңба, екіншісі — әнұран, үшіншісі — көк байрақ, төртіншісі — қазақ тілі» деген сөзі бар. Сондықтан егемен еліміздің қасиетті нышандарын қадірлеу – Қазақстанды Отаным деп есептейтін әрбір азаматтың парызы деп есептеймін. Рәміздер — біздің ұлттық арымыз бен намысымыз. Ендеше бүгінгі ашылып отырған Рәміздер алаңына құрметпен қарап, намысымызды қорғай білейік дегім келеді, — деді облыс әкімі.
Бекзат Саттарханов даңғылының бойында салынған алаңда Қазақстан Республикасының мемлекеттік рәміздері орнатылған және елдік мұратты меңзеген Елбасы мен қазақ елі қайраткерлерінің қанатты сөздері жазылған арнайы тас тақталар бар.
Рәміздер алаңын «Түркістан жарық тазалық» ЖШС салған. Нысан құрылысына жергілікті бюджеттен 230 миллион теңге бөлініп, қаржы толық игерілді, абаттандыру жұмыстары жүргізілді. Онда түрлі шағын архитектуралық формалар мен су бұрқағы, беседкалар, орындықтар, урналар, газондар мен гүл клумбалары орнатылып, декоративті ағаштар отырғызылған.
ОҚО әкімінің баспасөз қызметі
