Шымкентте 12 сәуірге қараған түні көпқабатты тұрғын үйден өрт шықты. Тұрғындар өртті сөндіру үшін өрт сөндірушілерді шақырған.
⠀
17-шағынауданда көпқабатты тұрғын үйден өрт шыққаны туралы хабарлама түнгі сағат бір шамасында түскен. Өрт сөндіру бөлімшелері келген уақытта үшінші қабатта орналасқан пәтерде жиһаздар мен заттар жанып жатқан.
⠀
«Пәтерден 1962 жылы туған ер адам өлі табылды. Кіреберістегі қатты түтінге байланысты өрт сөндірушілер тұрғындарды эвакуациялады», – деп хабарлады Шымкент қаласы Төтенше жағдайлар департаментінің баспасөз қызметі.
⠀
Көршілердің айтуынша, ер адам жалғыз өзі тұрған, ұдайы ішімдік ішкен. Оның пәтерінде әлденеше рет өрт болған, кейін ер адамды түтінге дер кезінде назар аударған көршілері аман алып қалған.
⠀
Өрттің нақты себебін анықтау үшін өрт-техникалық тексеру тағайындалды. Дегенмен, өрт сөндірілмеген темекінің кесірінен шыққан болуы мүмкін деген болжам бар.
⠀
