Көктемгі әскерге шақыру науқаны аясында «Сарбаз аналар комитеті «Аналардың жүрегі»» республикалық қоғамдық бірлестігінің өкілі Шарифа Ахметжанқызы Муминова өңір әкімдігі берген жаңа ғимаратта орналасқан Түркістан облысы қорғаныс істері департаментінің облыстық жинақтау бекетімен танысты.
Сапардың мақсаты – әскерге шақыру іс-шараларының ұйымдастырылуы, дәрігерлік және шақыру комиссияларынан өту жағдайлары, сондай-ақ әскерге шақырылушылардың жинақтау бекетінде болуының барлық кезеңдеріндегі тыныс-тіршілігі мен қамтамасыз етілу деңгейімен танысу.
Департамент бастығы подполковник Талғат Сайлауұлы Тұрабай қоғамдық бірлестік өкілімен жеке кездесіп, жаңа ғимарат бойынша егжей-тегжейлі экскурсия өткізді. Олар казармалық үй-жайларды, әскерге шақырылушылардың денсаулық жағдайына тексеру жүргізілетін медициналық кабинеттерді, психологиялық тестілеу кабинеттерін, әскери бөлімдер өкілдерімен жеке әңгімелесу бөлмелерін, сондай-ақ асхананы қарап шықты.
— Бүгін мен әскерге аттанар алдын біздің жігіттерге қандай жағдайлар жасалғанын көру үшін облыстық жинақтау бекетіне келдім. Жаңа ғимарат толық жабдықталған — медициналық кабинеттер барлық қажетті заттармен жабдықталған. Сондай-ақ мен әскерге шақырылушылармен сөйлестім, олардың армия туралы пікірлерін білдім. Жастарымыз қайсарлыққа толы, Отан алдындағы борышын өтеуге дайын. Әркімнің өз мақсаттары бар және оларға сенімді түрде жетуге дайын, — деп атап өтті Шарифа Муминова.
Сондай-ақ сапар барысында ол келген күні әскерге шақыру жүріп жатқан әскери бөлімдердің өкілдерімен кездесу өткізді. Әңгіме барысында бөлімшелерді таңдау кезінде әскерге шақырылушылардың қалауы, сондай-ақ Қарулы күштер қатарына кіретін жастардың ынталары талқыланды.
Облыстық қорғаныс істері жөніндегі департаментінің мәліметінше, көктемгі науқан барысында Түркістан облысынан 2500-ден астам азамат шақырылады. Бүгінгі таңда 800-ден астам әскерге шақырылушылар мерзімді әскери қызметке жіберілді.
