Түркістанда ашылған бұл орталықта келушілерге барлық жағдай жасалған. Бір мезгілде 200 адам қызмет көрсетеді. Орталық аумағында автотұрақ, қолөнершілер шеберханасы, келушілерге арналған жатын бөлмелер, намазханалар, асхана, медициналық қызмет көрсету бөлмесі, мал сою орны мен автотұрақ, ішкі демалыс алаңы да қарастырылған. Мәжіліс залы да бар.
Жаңа нысанның ашылу рәсіміне қатысқан облыс әкімі А.Мырзахметов Түркістанның туристік әлеуетінің зор екендігін айтып, бұл орталықтың облыстағы туризм саласын дамытуға тың серпін беретінін жеткізді.
Түркістан қаласының әкімі Бақытжан Әшірбеков мәжіліс залында алдағы уақытта атқарылатын жұмыстар жөнінде баяндады. «Кешен Қожа Ахмет Яссауи кесенесіне өте жақын орналасқан. Туристер саны жылдан жылға артып отыр. Мәселен, саяхатшылар саны былтыр 7000 адамға көбейген. Басты мақсат – туристерге жағдай жасау, оларды қалаға тарту» деп, атқарылған істердің негізгі мақсатын түсіндірді.
Туристерге қызмет көрсету орталығы 72 бөлмеден тұрады. Нысанның құрылысына 402 млн теңге жұмсалып, бір жылдың ішінде салынған.
Жәнібек НҰРЫШ
