Түбі бір түркі жұртының түпқазығы, рухани астанасы Түркістан қаласында Түркістан — түркі әлемінің мәдени астанасы жылының салтанатты жабылуына арналған гала-концерт өтті.
«Түбі бір түркілер» хореографиялық-пластикалық қомпозициясымен бастау алған конценрттік бағдарламада облыс әкімі Ж.Түймебаев сөз алып, барша жиылған жұртшылықты бүгінгі айтулы күнмен құттықтады.
— Түркі әлемінің бүгінгі замандағы кемеңгер көшбасшысы атанған Президентіміз Нұрсұлтан Әбішұлы Назарбаев «ТҮРКСОЙ» түркі әлемінің ЮНЕСКО-сына айналуы тиіс» деген болатын. ТҮРКСОЙ ұйымы түркі әлемінің мәдени астаналарын таңдау жобасын 2012 жылдан бері жүзеге асырып, Түркі дүниесінің ЮНЕСКО-сына айналды. Өткен жылдың соңында ТҮРКСОЙ тұрақты кеңесінің 34-ші отырысында Түркістан қаласын түркі әлемінің 2017 жылғы мәдени астанасы деп жариялау жөніндегі тарихи шешім қабылданды. Себебі, Түркістан – түркі қағанаттарының туы тігілген орда. Түркі халықтарының орасан зор оғландары ақ киізде хан көтерілген қасиетті жер. Түркі әлемінің маңызды жобасы Елбасының «Болашаққа бағдар: руxани жаңғыру» мақаласымен керемет астасып, жыл бойында ұлттық дәстүрімізді дәріптейтін көптеген шаралардың жоғары деңгейде өткізілуіне тікелей ықпалын тигізді, — деді әкім.
Бұдан соң аймақ басшысы мәдениет және спорт министрі Арыстанбек Мұхамедиұлы мен ТҮРКСОЙ халықаралық ұйымының бас хатшысы Қасейінов Дүйсен Құрабайұлына алғыс білдіріп, марапаттады. Түркия мәдениет және туризм вице министрі Хусейн Яйман мырзаға Қазақстан-Түркия достығы мен ынтымақтастығын дамытқаны үшін төсбелгі тақты. Ал қалған түркі елдерінен келген қонақтарға облыс әкімінің арнайы сыйлығы тапсырылды.
Бауырлас елдердің басы қосылған мерекелік шарада Әзірбайжан, Түрікменстан, Түркия, Өзбекстан, Қырғыз мемлекеттері мен Ресейдің Татарстан, Башқұртстан, Саха-Якутия, Тыва Республикалары және Қырымнан арнайы келген өнер ұжымдары өз өнерлерін паш етті.
Жабылу салтанаты барысында тұрақты кеңесінің 35-отырысының шешімі бойынша түркі әлемінің 2018 жылғы мәдени астанасы атанған Түркияның Кастаному қаласына түркі әлемінің мәдени астанасы символы мен туы тапсырылды. Бұдан кейін іс-шара Ш.Қалдаяқов атындағы облыстық филармония, облыстық опера және балет театрының әншілері мен барлық қатысушылар бірлесе «Түркістан — түркі әлемінің астанасы» атты әнімен аяқталды.
Еске сала кетейік, өткен жылдың соңында Әзірбайжанның Шеки қаласында өткен ТҮРКСОЙ тұрақты кеңесінің 34-отырысында Түркістан қаласы — түркі әлемінің 2017 жылғы мәдени астанасы болып бекітілді. Жыл бойы түркітілдес ұлттар арасындағы бауырластық байланыстар мен достықты нығайту, түркілік мәдениет пен өнерді ұрпақтан ұрпаққа жеткізіп, оны әлемге таныту мақсатында 40-қа жуық түрлі іс-шаралар ұйымдастырылды.
ОҚО әкімінің баспасөз қызметі
