Оңтүстік Қазақстан облысы Мақтарал аудандық №2 сотының судьясы пара алу кезінде ұсталды. Бұл туралы бүгін Облыстық соттың алқа төрағалары өткізген баспасөз мәслихатында сөз болды, — деп хабарлайды inform.kz.
Облыстық соттың Қылмыстық істер жөніндегі алқа төрағасы Зияддин Пірнияздің айтуынша, Мақтарал аудандық №2 сотының судьясы 500 мың теңге пара алу кезінде ұсталған. Қазір оның қылмыстық әрекетіне қатысты тергеу шаралары жүргізіліп жатыр.
Жиында сондай-ақ соттар этикасын бұзған судьялар жөнінде айтылды. Мәселен өткен жылы арнайы комиссияда 40 судьяның тәртіптік ісі қаралған болса, соның үшеуі қызметінен кеткен. «Жұмыстан босатылғандар Қаратау аудандық сотының судьясы Шаланов, Түркістан қалалық сотының төрағасы Серікбаев және Қазығұрт аудандық сотының судьясы Тастанбеков. Биылғы жылы бір судьяны жұмыстан босату туралы ұсыныс берілді»,- деді облыстық соттың судьясы Тамара Қалиқызы.
Яғни, қызметтен шеттетілген Қаратау аудандық сотының судьясы Ермахан Шаланов пен Түркістан қалалық сотының төрағасы Омар Серікбаев пара алып, ұсталған болатын. Сотта Шалановтың бір тұрғыннан 500 мың теңге көлемінде пара алғаны дәлелденіп, 7 жылға бас бостандығынан айырылған еді.
Ал Омар Серікбаев сотталушының жазасын жеңілдетіп беремін деп 3 млн теңге алған. Кейіннен сотта «қызмет бабын пайдаланып, алаяқтық жасады» деп танылып, 3 жыл 6 айға бас бостандығынан айырылды.
