Қаржы министрлігі әлеуметтік төлемге қарызы бар кәсіпкерлердің есепшотын бұғаттау тәртібіне өзгеріс енгізуді жоспарлап отыр.
Қазіргі кезде Салық кодексіне тиісті түзету енгізуге қатысты ұсыныс бар. Оған сәйкес, әлеуметтік төлем бойынша берешегі бар кәсіпкердің есепшоты бірден бұғатталмайды.
«Бүгінде қарызды мәжбүрлеп өндіріп алу кезінде әлеуметтік төлем бойынша шек қойылмаған. 100 теңге немесе 200 теңге қарыз болса, біз банк шоттарын бұғаттаймыз.
Ол дұрыс емес. Сондықтан әлеуметтік төлемдер бойынша шекті көтеру керек деп санаймыз. Қазіргі таңда ондай шек жоқ», – деді қаржы вице-министрі Ержан Біржанов сенатта өткен үкімет сағатында.
Отырыс кезінде ұлттық экономика министрі Әлібек Қуантыров табыстың көлеміне қарай салықты арттыру бастамасын түсіндірді. Оның айтуынша, жылына 40 миллионнан артық табыс табатындар осы сомадан асқан бөлігіне 15 пайыздық салық төлейді.
