Көшеге көкесінің атын беруге деген құлшыныс толастар емес. Ал маңдайша жазуларындағы қателік жойылатын түрі жоқ. Бұл туралы бүгін облыстық тілдерді дамыту басқармасы ұйымдастырған «Облыстағы ономастикалық мәселелер және оны реттеудің жолдары» атты семинарда айтылды. Алғашқы болып баяндама жасаған басқарма бастығы Балхия Көмекбаева, атаулардағы қателіктердің көбісі тіркелу жағдайында орын алатынын алға тартты. Сонымен қатар көше, жер-суға ат беруде тұлғалардың атқарған еңбектері ескеріліп және оны қатесіз жазуға мән берілуі тиіс.
